Wat hadien 5 snem ym lah pynbiang UC ka JHADC ïa ka pisa ba pynlut 9.71 klur

Shillong, Naitung 27: Ka Jaiñtia Hills Autonomous District Council (JHADC) kam shym la lah ban pynbiang bad aiti ïa ki Utilization Certificates (UCs) kaba dei ka jinglut ba la kot sha ka T. 9.71 klur, wat hadien ba la ïaid mynta la palat 5 snem, ong ka kaiphod Comptroller and Auditor General of India (CAG) kaba 31 tarik u Lber, 2019.
Ka JHADC ka la ïohpdiang ïa ka grants-in-aid na ka sorkar jylla ban pyntreikam ïa kiba bun ki skhim, ba kynthup ka Article 275 (1) ka Constitution (T. 181.37 lak), ka Special Assistance Grant (T. 3357.00 lak), bad ki jingtrei kiba khlem kynthup ïa ka Part IX bad IXA jong ka riti synshar ka ri (T. 1074.90 lak) ha ki snem 2015-16 haduh ka snem 2017-18.
Katkum ki kyndon ba la kdew hapoh ka hukum ba la mang, ïa kane ka jingïarap pisa dei ban pyndonkam hapoh ka snem mang tyngka.
“Hynrei na ka T. 46.13 klur ba la mang da ka sorkar pdeng ha ka snem 2015-16 haduh 2017-18, ki UC ba la kot sha ka jinglut kaba T. 9.71 klur ki khlem aiti wat hapdeng ka jingïaid kaba la palat 5 snem (Nailar 2022),” ong kaiphod CAG.
Ha ka jubab, ka JHADC ka la ong ha u Nohprah 2023, ba ka council ka la aiti ïa ka utilisation certificate na ka bynta ka pisa bynrap kaba T. 280.16 lak na ka pisa T. 3,357 lak kaba la ïohpdiang hapoh ka Special Assistant Grant. Kumta baroh ka pisa T. 3,351.79 lak la dep ban pyntreikam bad ka balance kaba sah ka long T. 5.21 lak.
Na ka bynta ka pisa kaba T. 181.37 lak ba la ïohpdiang hapoh ka Article 275 (1) bad T. 1,074.90 lak ba la ïohpdiang hapoh ki Area ba khlem kynthup ha ka Part IX bad IXA ka riti synshar, ïa ki scheme ne ki kam la lah ban pyndep bad ki kam ban aiti ïa ki utilisation certificate ki dang ïaid ban pyndep noh ïa kane ka jingaiti ïa ki UC.
Katkum ka jingbishar kam halor ka kheiñ ka diah la shem ba ka council kam shym la aiti ïa ki UC wat hadien ba la ïaid la palat 5 snem naduh ba la mang ïa ki jingïarap pisa, kaba pyni ba ka don ka jingduna ban bishar ïa ki kam bad ka jingbakla ban sngewthuh ïa ka jingpynlut hapoh ka council. Watla ka council ka la shim ïa ka kam ban aiti ïa ki UC kaba dei ruh halor ka jingïohpdiang ïa ka pisa hapoh ka Article 275 (1) bad ka Special Assistance Grant, hynrei ka la sngap jar pat halor ki UC ba dang sah kaba long T. 570.45 lak (53%) pyrshah ïa ki jingïarap pisa kaba hapoh ki Area ba khlem kynthup ha ka Part IX bad IXA. Kumta ka pisa baroh kaba sah ba kynthup ruh ïa ki UC ba sah ka la kot sha ka T. 690.62 lak.
Ha kajuh ka por ka kaiphod CAG ka la ai jingmut ïa ka council ban pynkhlaiñ ïa ki rukom treikam na ka bynta ban pyntreikam ïa ki skhim ne project ha ka por ba la buh ban kiar na ki jingpynslem palat ban aiti ïa ki UC bad ban lait na ka jingma jong ka jinglah ban pyndonkam bakla ïa ki pisa ba la mang.
Shuh shuh ka kaiphod CAG ka la pynpaw ruh ba ka don ka jingbym shai khyndiat ruh halor ka jingpyntreikam ka JHADC ïa ka Discretionary Grants (DG) bad Gratuitous Relief (GD). Kat kum ka jinglap ka CAG kat haduh ka 31 tarik Lber 2019 ka don ka jingpynlut tam ïa ka pisa haduh 3.94 klur ïa kaba ym tip shano la pynlut ruh namar ha ka jingshisha ka pisa ba la mang na ka bynta ka DG bad GR ka long tang 6 klur tyngka katba ka jingpynlut ka poi sha ka 9.94 klur tyngka kaba tam haduh 3.94 klur tyngka.ïa kane ka pisa ba tam la shim na ka Mang Tyngka jongka JHADC lyngba ka Major Head of Account- F Dev Grant (COF) bad Normal Dev Scheme & MDC Schemes. Haba ka CAG ka bishar bniah ïa ka rukom pyntreikam ne pynlut ïa ka pisa lyngba ka DG bad GR la lap ba kam don kano kano ruh ka jingshai bad kam don ka jingbud beit bud ryntih ïa ki kyndon ha kaba ïadei bad ka jingjied ïa ki nongïoh jingmyntoi na katei ka DG bad GR.La ïathuh ba ka shu pdiang beit ïa kalist ba phah ki MDC ryngkat ki APR na ki nongioh jingmyntoi. Ym shym la kdew pat ha kano ka rukom la pynshong nongrim ban jied ïa kiba dei hok ban ïoh. Ym shym la don ki voucher kumba la kdew ha ka Rule 42 jongka Jaintia Aunomous District Fund Rules 1967 jongka JHADC.
ïa ka pisa la shu pyllait da u Secretary ka Executive Committee sha ki MDC da kaba ai tang ki APR jongki nongïoh jingmyntoi. Haba ka CAG ka bishar ïa ki APR jong ki nongïoh jingmyntoi la lap ba 918 ngut ki nongïoh jingmyntoi na ka DG ki ïoh haduh 4.93 klur na ki MDC jongki na ka bynta ban pynbha ïing, pynbha dukan, shna ïing, thied tin sop ïing, ban pynbha lyngkha, ki kam shimet bad ter ter bad kumba 8.34 ngut kiba ïoh ïa ka GR haduh 5.01 klur tyngka na ki MDC jongki kine ruh ki pynpaw ban pynbha ïing, shna ïing, pynbha dukan, ïarap bai skul, thied dawai, thied kot, thied tin sop ïing, siew bai skul, bad ki kam shimet.