Wat ha rta 60 snem dang aplai EPIC ki bar jylla ha Majai, Shella bad Mawlong, ïathuh ka KSU

Shillong, Nailar 26: Ka KSU South Khasi Hills ka la lap ba bun na ki bar jylla kiba wan shong shnong sha ka thaiñ Majai, Shella bad Mawlong wat ha ka rta kaba la 60 snem ki dang aplai ïa ka EPIC bad haba pan pat ïa ki cancellation certificate na ki shnong ba ki wan, kine ki bar jylla kim don satia.
Ka KSU ka la dawa ba dei ban bud ïa ki kyndon kiba don hapoh ka Meghalaya Transfer and Regulation Act 1971 da kaba pyntreikam ruh ïa ka Cutoff Year kaba mut ba ïa ki bar jylla kiba sah ha shwa ka snem 1971 dei ban ithuh kum ki nongshong shnong bad kiba wansah palat ne shaneng ka snem 1972 ym dei shuh ban ithuh ïa ki bad dei ban beh noh, khamtam eh kiba wansah sha ki shnong kiba hab hapoh ka jingkhmih jong ka Hima Sohra.
“Kaba lyngngoh ka long ba nangno kine ki bar jylla ki ïoh ïa ki kot ki sla ban aplai ïa ki EPIC, kumta ïa kane ngi aiti sha u CEM ban phah jingthoh sha baroh ki khlieh nongsynshar ban pan census ne khanasamari ïa ka jingdon ki bar jylla kiba don ha kane ka thaiñ jong ngi bad ngi la ong ruh ba ka lah ne em ban long ba lada ïaid noh da ka Cutoff year haba ïadei bad ki bar jylla kiba wan buhai shnong sha kane ka thaiñ namar katkum ka aiñ 1971 kamut ba ki bar jylla kiba sah hapoh kane ka snem yn ailad ban sah hynrei na ka 1971 shaneng dei ban pynmih noh na kane ka thaiñ, namar kumba ka long mynta ym pat ju don kiba shimkhia namar ki bar jylla kiba don sha kane ka thaiñ kim dei ki nong India hynrei ki nong Bangladeshi kiba shu wan rungtuh bad dei halor kane ba ki nud ban pyni bor ïa ka seng KSU ha kito ki snem ba la leit namar ki sngewthuh ba kim don jaka shuh ban leit,” ong u nongïalam ka KSU ha ka jingïakren bad ki lad pathai khubor ha ka Lah Sngi u Blei.
U la ong ba katkum ka RTI ba la pan ha u snem 2016-17 haba pan ïa ka jingtip halor ka electoral roll la lap ba bun na ki bar jylla ki aplai ïa ka EPIC ynda ki la dap ha ka rta kaba 60 snem, hynrei haba pan ïa ka cancellation EPIC ruh kim don hynrei ki aplai EPIC ha Majai, Shella, Mawlong bad kiwei ki shnong, kane ka pyni ba ki shu wan rieh tngen, shong thap ha kane ka ri Khasi.
“Ka seng kan bteng ban pynjur ki jingkhynra ha ka thaiñ bad ngi kyrpad ruh ïa ka Council ban ïa khynra lang bad ka KSU bad ngi pynshlur ïa ki samla ban wad ki kam ha ki jingtei bapher bapher namar sha kine ki thaiñ ka jur palat ka jingleh benami, hynrei kaba lyngngoh pat ka long ba ka seng haba ka pan ïa ki kyrteng ki trai jaka na ki sordar hynrei kim ai, namar ka seng ka kwah ban buddien ïa kane ka rukom aiwai, namar haduh mynta kim don kiba buddien ïa kane kam sha ka thaiñ,” u la ong da kaba bynrap ba ki don ki bar jylla kiba dang shu wan bad don ruh kiba la wan naduh mynshwa hynrei ym don kiba tip, kumta halor ka jingkhynra ïa ki bar jylla, u CEM u la ong ba un sa pyntip ïa ka seng ïa ki sngi ban leit khynra lang sha kine ki thaiñ.
“Kumta ngi la banjur ïa ka Council ban shim khia namar dei ka rikynti jong ki briew jong ngi hi ba ki bar jylla ki sahwai bad kum ki nongshongwai haba phai sha ki jaka kiba hab hapoh ka jingpeit ka Hima Sohra,” bynrap u nongïalam ka KSU.