Shillong, Jylliew 10: Ka tnad Animal Husbandary bad Veterinary ha ka sngi U Blei ka la pyntip ba ka doh bad ka dud jong ki masi ba don jingpang at ha ka sniehdoh (Lumpy skin disease) ym dei satia ban bam bad ym dei ruh ban die.
“Katei ka jingpang at sniehdoh kam ïabit ha u briew hynrei ïa ka doh bad ka dud jong ki masi ba don jingpang ym dei satia ban bam lane ban die,” ong u Secretary ka tnad, u Dr. Manjunatha C.
Katkum ka jingong jong u, katei ka jingpang at sniehdoh kadei ka jingpang kaba phriang ha ki jingri bad kumta ka ïabit da kaba dait ki pyrjong, ki skain bad ruh ki dkhap. Kumta ki mrad kiba ïoh ïa kitei ki jingpang ki shimpor kumba 2-3 taiew ban koit.
Na bynta ka jingshngaiñ, ka tnad ka bthah ruh ïa ki nongrep ba ki dei ban pynïakhlad noh la ka jong ïa kito ki jingri ba pang na ki jingri kiba shait ba khlain.
Shuh shuh la ong ruh ba ha kito ki jaka ba don ki jingri ba ïoh pang dei ban synreit da ka sodium hyphochlorite (2-3%) lane ka ka phenol (2%/) lane ka Formalin (1%).
La bthah ruh ïa ki nongrep ba kin pyntip noh sha ki Rapid Response Teams jong ka Veterinary Department da kaba shu pyntip ha u helpline number ban wan synreit dawai ïa ki jaka ba don katei ka jingpang bad ruh ban sumar ïa ki jingri ba don jingpang.
Nalorkata la bthah ruh ïa kito kiba sumar ïa kitei ki jingri ba don jingpang dei ban da phong da ki jingphong kti lane ki jingda khmat. La bthah ruh ba dei ban khang ïa ki briew ban leit ban wan ha kito ki sem ri jingri ba don katei ka jingpang.
Shuh shuh la ong ruh ba ïa ki pyrjong, ki skain ha ki sem ri jingri dei ban tehlakam da kaba pyndonkam da ki dawai synreit pyrjong.
La ong ruh ba lada jia ba don ka jingïap jong kitei ki jingri ïa ka met jong ki dei ban tep da kaba tih jylliew bha. Nalorkata, la bthah ruh ba ïa ki iew masi kiba don hapoh 10 kilometer radius na ka jaka ba jia dei ban khang shwa.
Haba ïadei pat bad ka jingai tika, ka tnad ka la ong ba baroh ki jingri ba koit ba khlain kynthup naduh ki masi khun ba palat 4 bnai lane tam, kiba don 5kilometer sawdong dei ban ai tika ban khang ïa ka jingphriang jong katei ka jingpang at sniehdoh.
La pyntip ruh ba la pynbeit ruh ïa ki jaka ai tika bad ki nongrep ki lah ban pyntip ha ki helpline number na bynta ka tarik bad ka por ban ai tika ha ki shnong ba marjan namar katei ka tika ka lah ban ïada ïa ki jingri bad ruh ïa ka jingïap jong ki.
Ka tnad ka la pyntip ruh ba ïa ka jingsumar yn ai sha kito ki jingri kiba don jingshitom.
Na ka liang ka tnad ka kyntu ruh ïa ki nongrep ba ki lah ban pyntip ha kine ki helpline number ban ïoh ïa ka jingsumar ïa ki jingri jong ki, kiba shitom bad na ka liang ka sorkar kan sa phah da ki mobile veterinary clinic sha ki shnong ban ïoh ïa ka jingsumar bad ban synreit dawai.
Ka tnad ka pyntip ruh ba kine ki helpline number harum, ki nongrep ki lah ban wad jingtip na bynta ka jingsumar, ka tika bad ruh kiwei kiwei ki jingtip ba ïadei bad ka jingpang at sniehdoh ki masi.
Kine ki kynthup Ri-Bhoi District – 6009328729, East Khasi Hills – 9366825517, West Khasi Hills:- 9233849930, South west Khasi Hills – 9366801413, West Jaintia Hills – 6033416066 bad ha
East Jaintia Hills – 8974465829.
