Shillong, Nailar, 16: U MLA ka seng BJP u Bah Sanbor Shullai ha ka sngi Baar u la ong ba ka BJP kan ïalam ïa ka sorkar hadien ka ilekshon. U Bah Sanbor u la ai jingmut ruh ba ka party kam dei ban bujli noh ïa u Bah Earbest Mawrie namar ka por kam shah shuh ban pynleit jingmut shata ïoh ba kane kan long ruh kum ka jingsdien phasi da lade.
Ha ka kyrwoh sha ki lad pathai khubor u Bah Sanbor u Sanbor u la kam ba na ka liang jong u u don ka jingïakren bad katto katne ki MLA bad ki MDC ha Rilum Jaintia ban pynïasoh noh sha ka BJP.
U Bah Sanbor u la ong ruh ba lada u Bah Himalaya M Shangpliang un wan pynïasoh sha ka BJP un long u kyrtong ba kynsai ban ïakhun bad u kular ruh ba na ka liang jong u un leh ïa kaba donkam wat ban ïakren ruh bad ki nongïalam ka party lada u Bah Himalaya un pynïasoh sha ka BJP.
Shuh shuh na ka liang u Bah Sanbor u la ai ruh ka jingkyrshan pura ïa u Bah Earnest Mawrie bad ïa ki kam kiba u la leh da kaba ong ruh ba u Bah Mawrie u la leh ïa kaba bha tam na bynta ka party.
U Bah Sanbor u la ong ruh ba ka BJP kam dei satia ban kyrkieh ban bujli President namar kan long kumba sdien phasi hi da lade ïa lade bad u la ai jingmut ba dei ban ailad beit ïa u Bah Earnest ba un pyndep ïa ka jinglong President haduh ban kut ka samoi jong u.
“Na ka liang jong nga, nga la ïakren bad u Dr Chuba Ao bad ngan ïakren ruh bad kiwei pat nongïalam ka party ha Delhi ba kin pynneh beit ïa u Bah Earnest bad ban pynsahngeh noh ïa ka jingthmu bujli President” ong u Bah Sanbor.
U Bah Sanbor u la ong ruh ba u Bah Earnest u la leh ïa kaba dei halor ka jingjia ha Tura, ha kaba kaei kaba u Bah Earnest u leh ka long ka jingai mynsiem sha baroh ki nongtrei party ha Garo Hills.
“Nga kyrpad ïa ki nongïalam ha ka party ba kin trei shitom na ka bynta ka party bad ka por ruh ka la khim lada ngin bujli lei sa u President ïoh kan wan lam pynban ka jingkulmar jingmut ha ki nongtrei ka party wat ka jingphet seng kaba jur ruh” bynrap u Bah Sanbor.
Shuh shuh u Bah Sanbor u la ong ruh ba kum ka party ka donkam ban ïatreilang bad ka jingdon ki kynhun ha ka party kan pynduhnong hi ïa ka party.
“Kito kiba long pyrshah ïa ka nongrim ka party ym dei ban ai jem hynrei dei ban leh da kaba tyngeh pyrshah ïa ki” ai jingmut u Bah Sanbor.
