Wat buh ka ktien, ‘ym lei lei’ ba shah dait ha ki ksew la jong ne ki ksew ba la ïoh tika: FB Basan

Mawkyrwat, Nailur 29 : Ka ophis jong u District Medical & Health Officer (DM&HO) ryngkat bad ka ophis jong u District Animal Husbandry & Veterinary Officer (DAH&VO), South West Khasi Hills District, ki la rakhe ïa ka ‘World Rabies Day 2025’ kaba ka phang pdeng ka long, “Act Now, You, Me, Community”, ba la pynlong ha ka Multipurpose Hall jong ka ophis u Deputy Commissioner, South West Khasi Hills District.
U bah F.B. Basan, MCS, Assistant Commissioner, South West Khasi Hills District u la long u kongsan ha kane ka jingrakhe bad haba pynbud da ka jingkren jong u, u la kyntu ïa ki paidbah ba kin long kiba husiar bad shimkhia ban ïada na kane ka jingpang lyngba ka jingshim tika ha ka por kaba biang lada u ne ka briew ki shah dait ha ki ksew lamwir.
U la kyntu ruh ïa ki paidbah haba shah dait ha ki ksew la ka long ki ksew ba ki ri ne ki ksew lamwir kim dei ban kheiñstieng hynrei ki dei ban shim ïa ka jingkitkhlieh da kaba ki shim ïa ki lad jingsumar kum kaba sait da ka um bad ka sabon, bad kham kyrpang eh ka dei ba kin leit mar mar ha ki jaka sumar ba jan jong ki ban shim ïa ka tika kaba thikna khnang ban ïoh ka jingsumar kaba biang shwa ban dier ka por. “Wat buh ka ktien, ym lei lei ba dei u ksew ba la jong ne u ksew ba la ïoh tika, hynrei dei ban pynthikna pat ba u ne kaba shah dait ha ki ksew ki dei ban shim kloi ïa ki lad jingïada”, kyntu u bah Basan.
Ha ka juh ka por u bah F.B. Basan, MCS, Assistant Commissioner jong ka South West Khasi Hills District u la pyllait paidbah ruh ïa ka durkhih (video) kaba ïa dei bad ka jingrakhe ïa ka sngi kyrpang ha kaba ki briew kin shim ïa ki lad jingïada lada shah dait ha ki ksew bad ba kin shim ki lad jingïada ha ka por kaba biang.
Ha kane ka prokram kiwei ki nongai jingkren lyngba ki lad jinghikai ïa ki paidbah ki kynthup ïa u Dr. F.R. Lartang, District Medical & Health Officer jong ka South West Khasi Hills District u Dr. B.K. Blah, District Animal Husbandry & Veterinary Officer (DAH&VO) jong ka South West Khasi Hills District, bad u bah J. Ramsiej na ka District Forest Department, Mawkyrwat Division.
Ha kane ka sngi la ïoh ruh ka jingrwai kyrpang na ki khynnah skul jong ka Maharam Government Higher Secondary School, Mawkyrwat bad ki khynnah skul jong ka Nativity Higher Secondary School, Mawkyrwat kiba la ai ïa ka jingshad ba itynnad.
Ki nongwan ïashimbynta ha kane ka jingrakhe ki long naduh ki tnat sorkar hapoh ka district, ki Rangbah Shnong, ki nonghikai bad ki khynnah skul, kiba la wan ban ïoh jingtip bad pynshai bniah shaphang ka jingma jong ka rabies bad ka rukom ban ïada na ka jingpang.