Shillong, Ïaiong 28 : U Myntri ka tnad C&RD, Bah Hamletson Dohling ha ka sngi Palei u la ong ba ka jingdawa bad ki kyndon ba la buh da ka Harijan Panchayat Committee ka la pynbitar pynban ïa kiba bun kynthup ïa u kum u Myntri ba don ha ka sorkar jylla.
“Ka jingdawa jong ki ka la pynkhluit khlieh pynban. Ha ka jingshisha ki la dei ban sngewnguh ba ka sorkar ka khot ban ïa kren ban pynbeit ïa ki jingeh ba ki kynduh hynrei la ïohi ba ki dawa bad buh da ki kyndon bapher bapher kaba ym i lah satia ban pdiang,” u la ong haba kren bad ki lad pathai khubor.
U Bah Hamlet uba dei ruh u Myntri barim ka tnad Urban Affairs bad Nongïalam barim ka KSU u la ong ruh ba kum u Myntri ba don ha ka sorkar u pyrshah jur bad un ym shah ruh ba ka sorkar kan kohnguh ïa katei ka jingdawa jong ki.
“Ki la dei ban ïatreilang bad ka sorkar bad ki dei ruh ban pdiang ïa kaei kaba ngi pynbeit na ka sorkar. Ym dei satia ba ma ki kin buh kyndon ïangi ne ban wan batai stad. Kane kadei ka sorkar kaba pynïaid mangi bad kumta ki dei ban sngap ïa kaei kaba ngi pynïaid,” u la bynrap shuh shuh.
Shwa kane, u Bah Hamlet u ong ruh ba ki nongïalam jong katei ka kynhun ki la shim kabu pynban ïa ka jingïohlad jongki ban kynduh ïa ki bor sorkar ha ka jaka ba kin ai ka jingïatrei lang bad ka sorkar.
Kum uwei na ki Myntri ba la don bynta bha naduh ba sdang ban ïoh pynkynriah noh ïa kitei kiba sah ha Them-metor sha kawei pat ka jaka, u Bah Hamlet u la ong ruh ba ka jingkheiñ ba ki ïoh lum ha katei ka por ka long ba ki nongtrei ba trei ha Municipal ki don kumba 128 ngut bad kiba trei ha kiwei pat ki tnad sorkar ki don kumba 56 ngut ei ei.
Halor kane, na ka liang jong u, u la kyntu ba ki dei ban kohnguh ïa ka jaka ba la pynkhreh da ka sorkar bad ba kim dei satia ban batai stad ne buh kyndon.
Kumban shu kdew hangne, na ka liang u Symbud Myntri Rangbah ka jylla, Bah Prestone haba kren hadien ka jingkynduh bad ka HPC dang shen u la ong ba katei ka kynhun ka dawa ba baroh ki longiing kiba don kumba 342 tylli ba ka sorkar kadei ban ai mar 200 square meter ka jaka ban shna iing bad ba ka sorkar kadei ban bei ïa ka jinglut jingsep sha ki longïing ba kin shna ïa ki iing ki sem jong ki.
