Wat batai stad ko AITC phi dang shu wan mynnin hapoh Meghalaya : Dy CM

Shillong, Jymmang 7 : Haba pynphai nia ïa ki jingkynnoh jongka All India Trinamool Congress (AITC) ne ka Trinamool Congress(TMC) ba ka sorkar MDA hapoh ka jingïalam ka NPP ka khlem trei ei ei na ka bynta ki paidbah namar kam don ka jingroi jingpar u Symbud Myntri Rangbah ka jylla u bah Prestone Tynsong u la ong ba ka AITC kam dei ban wan batai stad ei ei ruh em namar ki dang wan ha Meghalaya dang myn hynnin.
“ Wat wan batai stad ei ei ruh em ko AITC namar phi dang wan dang hynnin ha Meghalaya. Lada phi kwah ban tip ïa ki jingshisha leit sha ki shnong ki thaw bad tohkit na ki paidbah phi sa sngap aiu ki paidbah kin jubab namar tang ha ka surok ruh ka sorkar MDA ka la dep pynlut ym duna shuh ïa ka 6000 klur tyngka ban pynïasoh na kawei ka shnong sha kawei pat ka shnong ha kine ki saw snem tam ba la leit noh. Nalor kata lada phai sha ka kiwei kiwei ki bynta ruh ka sorkar MDA ka la pyrshang ban ai ka jingshakri ba bha tam sha ki paidbah” ong u Symbud Myntri Rangbah.
Na ka liang ka AITC dang hynnin ka sngi ka la kynnoh ha ki social media ba wat hadien 50 snem ba la ïoh ïa ka jylla ba pura ruh, ka sorkar MDA ba la ïalam da ka NPP kam lah ban ai ka jingshakri ïa ki paidbah naduh ka pule ka dangle jong ki khynnah haduh ki samla. Nalor kata kam lah ban pynbiang ïa ka umdih jur sa tang ka jingkyrduh um, ka bor ding elektrik ruh jur sa tang ka lip, ka jingdheng kali kaba jur ym don ki surok ba thymmai, ki nonghikai ki hap ban ïakhih ban ïoh ïa ki jingsiew jongki nalor ba ka sorkar ka jur tang ka kular ïa ki katba ka jingpyntreikam ïa ki kular pat kam don. U Myntri Rangbah ka jylla u Conrad Sangma u kiar beit ban ïakynduh ïa ki nonghikai bad wat u myntri ka tnad pule puthi ruh kim kheiñ kor ïa ki nonghikai.
Ka AITC ka la buh ruh da ki jingkylli hato ki nonghikai kim dei ki nongsaiñ dur ïa ka lawei jongka jylla namar lyngba jongki kin mih ki khun samla ki ban kit ban bah ïa ka lawei jong ka jylla, hynrei ka jinghap ïakhih ban ïoh tulop kam ktah tang ïa ki khynnah skul bad ki samla pule ba mynta hynrei wat ïa ka pateng ban dang wan ruh.
`Kumta la ong ba ka AITC kan ym shong kli kti katba ki paidbah bad ki nonghikai kim ïoh ïa ki hok ki pot ba ki dei ban ïoh na ka sorkar.