Wat bah jamin, hynrei sdien phasi ne set shi jingim ïa u ba pynïap ïa ki Khun

Shillong, Jylliew 06: Kiba haïing hasem jong ki arngut ki shipara kiba la shah pynïap ha la u jong u kpa ha Nongrah ha kine ki sngi baladep, ki la kyntu ba ym dei satia ban bah jamin ïa u kpa jong kine ki khynnah bad dawa ruh ba ka aiñ kadei ban pynsaja da kaba sdien phasi ne set phatok shi jingim ïa u.
Ïa kane, kiba haïing, ki la pynpaw haba kren ha ka jingïalang thang mombati mynta ka janmiet ha Khyndailad ba la pynlong da ka Awakening India Movement (AIM) ryngkat ka jingïasnoh kti lang da ki spah ngut ki paidbah.
Na ka liang kiba haiing, ki la kyntu ïa ki Seng, ki Nongsaid aiñ bad kiwei kiwei ba ym dei satia ban leit bah jamin ïa une briew, uba kyrteng Joefreeson Jana, namar kane ka kam runar kaba u la leh.
Ai jingpynsaja beit ha u tyllai phasi ne ka jingshong along ba shi jingim dawa ki ba ha ïing jong ki arngut ki heprit ha ka jingthang mobati ha Khyndailad.
Ka Awakening India Movement (AIM) mynta ka sngi ki la pynlong ïa ka jingthang mobati ha Khyndailad ban pynrem jur ïa u kpa ki arngut ki heprit kiba la shah dkhat jubor ïa ka jingim jong ki ha u Joefreeson Jana ha ka 30 tarik Jymmang ha Nongrah.
Haba kren ha kane ka jingïalang u Chairman ka AIM u Bah Banshai Marbaniang u la pynrem jur ïa kane ka kam runar une u briew bad u la dawa na ka bor jong ka aiñ ban ai ka jingpynsaja da ha u tyllai phasi ïa une u riew runar. Shuh shuh u la ong Bah Banshai u la ong ba kane ka jingthang mobati ka long ban pynpaw pyrthei ïa ka jingdiaw jingsngew sih ïa kaei kaba la jia ïa ki arngut ki heprit.
Haba pynrem jur ïa ki bor synshar district kiba la bthah ban weng noh ïa ka poster kaba don ki dur kine ki heprit u Bah Banshai u la ong ba na ka liang ka seng kaei kaba ka leh kam leh be-ain bad kaei kaba ki leh ka long hadien ba ka dur hi kine ki heprit ka la phriang ha ki lad pathai khubor bad ki rynsan social media hi.
Shuh shuh u Bah Banshai u la pynrem jur ïa ka jingbym shimkhia ka Rehabilitation Centre, ka Meghalaya AIDS Control Society kaba la ailad ba un ïaid sahuh wat hadien ba une u briew u la mih na ka Rehabilitation Centre ruh da kaba ong ‘jin lada kine ki bor ki shim khia kane kaei kaei ka lah ban ym wan jia’
Haba kren na ka liang kiba ha ïing ki la dawa beit ba ka jingpynshitom kaba ki dei ban ai da ka jingpynsaja da kaba phasi ne set ïa une u riew runar ïa ka jingset byndi kaba shijingim. Shuh shuh ka ïing ka kyrpang ba ki paidbah kin don lang bad ka ïing ha kino ma kino ki khyllipmat kiba ki donkam.
Na ka liang pat u nongïalam ka kur Kharbuki u la pynpaw ïa kaei kaei kaba kum ka kur kam pat lah ban shemphang ba kum kane ka lanot kan jia ha ka kur jong ki.
Ha kane ka sngi la ïoh ruh ka jingkren na ki riew paidbah kiba la pynrem jur ïa une u briew bad ba dei ban ai ka jingpynsaja kaba tyngeh.