Wat ba la phah 6 sien ki jingpynkynmaw, ym pat jubab u Myntri Rangbah ïa ki nonghikai

Shillong, Nailur 29: U Commissioner & Secretary ba khmih ïa ka tnat Pule Puthi ka sorkar jylla u Vijay Kumar Mantri ha ka sngi Nyngkong u la kynduh ïa ki nonghikai adhoc kiba dang ïakhih hapoh ka lama jong ka Federation of Adhoc School Teachers of Meghalaya (FASTOM), kiba la ïakhih da kaba shong kyllaiñ myngor mynta la palat 192 kynta bad wat hadien ba ka Federation ka la phah haduh 6 sien ki shithi pynkynmaw sha ka ophis u Myntri Rangbah ba un jubab ïa ki jingdawa jong ki, hynrei haduh mynta u Myntri Rangbah u khlem pat jubab ïa ki jingdawa jong ki.
Ki la rai ban bteng da ki jingïakhih tat haduh ba ka sorkar jylla kan mynjur ïa ki jingdawa jong ki ban kyntiew kyrdan ïa ki skul adhoc sha ki deficit system.
“U Mantri u la kular ia ngi ban pule bniah bha ïa ki jingdawa jong ka federation,” ïathuh u Publicity Secretary ka FASTOM u Babu EG War.
Kane ka rai ban ïaibteng biang ïa ki jingpyrshah la shim hadien ba ki nongmihkhmat jong ka federation ki la pynpaw ïa ka jingbym sngewhun ïa ka jingïalang ba dang shen bad u Myntri ka tnat Pule Puthi ka sorkar u Bah Lahkmen Rymbui, uba la ong ba ka sorkar kan pule bniah bha bad ban bishar ïa kiba bun ki jingtyrwa ban pynbeit thymmai ïa ki kyrdan jong ki skul ha ka jylla ha shwa ban poi sha ka rai kaba khatduh.
Katkum ka jingong jong u vice president ka FASTOM u Babu S Jungai, ka jingtyrwa na ka bynta ka Meghalaya Education Grant (MEG) ka dang dei ha ka kyrdan jong ka jingsdang, bad ki nonghikai adhoc kim pat lah ban pynthikna shaphang ki jingpyntreikam ïa ka.
“Kum ki nonghikai adhoc, ngim pat lah satia ban tip la kan pyntreikam ne em ha ka sngi kaba khatduh. Kumta ngin ïaineh bad la ki jingdawa ba kongsan jong ngi, kaba dei ka jingdonkam ban kyntiew kyrdan ïa ki skul adhoc sha ka deficit system ne deficit pattern,” u la bynrap.
Ki nonghikai kiba dang pynlong ki jingïakhih ki la pynpaw ïa ki jingsngewkhia halor ka jingduna ki lad jingïakren na ki ophisar ba phah da ka sorkar wat hadien ba ki la phah haduh 6 tylli ki jingpynkynmaw sha ka ophis jong u Myntri Rangbah ka jylla.
“Ngin ïaibteng ban ïakhih tat haduh ba u Myntri Rangbah un jubab ïa ki jingdawa jong ngi,” ki la ong.