Wat ba la mang da ki klur ban pynkhuid ïa ka wah Umkhrah, hynrei khlem poi shano shano: Bah Nonglang

Shillong, Jylliew 08: Kawei na ki seng kaba kwah ban pynneh pynsah ïa ka jinglong jyrngam bad ka khuid ka suba ha Nongbah Shillong ka Green-Tech Foundation kaba dei ka kynhun lane ka seng trei mon sngewbha, ka la pynlong ïa ka jingïaid paidbah na Mawlai haduh Motphran bad ai ruh ïa ka jingpynsngewthuh paidbah halor ka thong “Clean and Green Shillong” ha kane ka jylla Meghalaya.
Ha ka prokram kaba la pynkut ha Motphran, na ka ka liang u Bah Haban Nonglang uba dei u Chairman jong ka Green-Tech u la ïathuh ba ka jingjaboh mynta ha ka jylla ka la paw nam bha ha India ha kaba ha u snem 2020 ka nongbah Shillong ka la don ha ka kyrdan ba 6 kum ka nongbah ba jakhlia tam ha ka ri bad khamtam eh ka jingjaboh jong ka Wahumkhrah kaba ka sorkar jylla ka la mang da ki klur ban pynkhuid hynrei kane ka khlem poi shano shano ruh bad ym ju kham ïohi satia ba kan don ka jingpynkhuid manla ka ka por ïa kane ka wah.
Na ka liang jong u, u la ong ba kane kam dei ka jingleh jongno jongno hynrei ka rai na shimet shimet jong u ne ka nongshong shnong.
Halor kane u Bah Nonglang u la pynkynmaw ba ka jylla kan sa pdiang ïa ka National Games ha u snem 2027 hynrei hato ym lehraiñ lada kiwei ki jylla ki ïohi lut ïa ki jingjaboh ka jylla.
Shuh shuh ha kaba ïadei bad kane na ka liang jong u, u la ong ba ka jingpyntuid ïa ki jaboh na Ïewduh, Polo, bad kiwei kiwei ki dong sha Wah Umïam ka la long kaba i shyrkhei haduh katta katta. U la ong, “Lada siang da ka ksiar bad kumjuh ïa ka pisa ba la mang man la u snem na ka bynta ban pynkhuid ïa ka Wah Umkhrah ka la dap bad ka la biang.”
U Bah Nonglang u la ong ruh ba ka daw bah ba ka Wah Umkhrah ka nang kiew ha ka jingjaboh ka dei na ka jingbym pyntrei hok ïa ka kam kumba ka dei ban long. “Halor kane ngim lah satia ban kynnoh ïa ka sorkar, teng teng ïa kine ki kam la bynshet ha ki tnat bapher bapher, ha ki ophisar bad ha ki agency hynrei ngim ïohi eiei ba kin pyndep ïa la ka kamram,” bynrap u Bah Nonglang
Ha kaba ïadei bad kane u nongïalam ka Green- Tech u la angnud ba kane ka khubor kaba dei ban ïakren shaphang ka jingkhuid, kan ym long tang ha ki Dorbar Shnong hynrei ha ki rynsan jong ki MLA bad wat ha ki rynsan niam ne balang bapher bapher ba kane ka jingmut jingpyrkhat kadei ban rung ha ki. “Wat ha ki kynhun niam ne Balang ruh kane kadei ban rung hapoh ki jingmut jingpyrkhat jong ki ba kin ai ki jingpynsngewthuh paidbah halor ka jingdonkam ban long kiba leh khuid,” u la bynrap.
Na ka liang u Chairman ka Green Tech Foundation u Bah Nonglang u la ai ruh ka jingïaroh ïa ka MARODA bad ki dkhot jong ka, hapoh ka jingïalam jong u President u Bah Evandul Marbaniang ba ki la pynlong ïa kane ka jingïaid paidbah ban pynsngewthuh ïa ki nongshong shnong halor ka jingdonkam ban leh khuid naba ki sngewthuh ba kam ñiah auto jong ki kadei ka pliang ja lyngba ka jingkamai jong ki kaba manla ka sngi.