Wat aiti shalan ka M/S Jai Maa Coal Pvt. Ltd ïa u Dewiong na Garo sha Bangladesh

Shillong, Jymmang 3 : Ki Seng Bhalang bapher bapher na ri lum Garo kynthup ïa uwei u nongtrei mon sngewbha uba paw bha u Kingstone Bolwari ki la ai da ka jingthoh sha ka Chief Secretary jongka jylla I Kong Rebecca V Suchiang ha kaba la dawa ba ym bit ban aiti sha ka M/s Jai Maa Coal Private Limite, (JMCPL) ban shalan ïa u dewiong ba la lumthup ha Gasuapara sha Bangladesh kumba la dep ai jingmynjur bad jingthoh da u Under Secretary jongka tnad Mining and Geology ha ka 28 tarik Iaiong 2022 namar lada ailad ka jingtih bad khaïi dewiong beaiñ ha ka jylla kan dang jur shuh shuh.
Ha ka shithi sha ka Chief Secretary la pynpaw ba wat u Deputy Commissioner (DC) jongka South Garo Hills ruh u la ai ka jingmynjur namar la dep pynmih wat ïa ka Standard Operation Procedure (SOP) ha ka 29 tarik Iaiong 2022 ban shalan ïa une u dewiong ba la lum thup ha Gasuapara.
La pynpaw ba kumba long mynta ym don satia uta u dewiong uba lum thup ha Gasuapara kumba la pynpaw da ka tnad Mining and Geology nalor kata ha ka jingthoh ne permission la pynpaw ba la shah ruh ïa ka JMCPL ban shalan wat ïa u dewiong uba na shabar ruh lyngba ka South Garo Hills ban pynpoi sha Gasuapara Land Custom Station ne ka kad khaïi Gasuapara ban pynpoi pat sha Bangladesh. Lada ailad ïa kane ka komapani ban wan kit ïa u dewiong na shabar ka pynpaw ba la ailad ban jur biang ka tih dewiong beaiñ bad khaïi beaiñ ïa u dewiong sha Bangladesh.
Nalor kata la pynpaw ruh ba ym don ka jaka ba la buh ban lum jingkheiñ ïa ki trok kiba ïaid ha ka shisngi shisngi bad katno Matric Ton u dewiong ki pynpoi ha ka shisngi sha Gasuapara ban shalan sha Bangladesh. Nalor kata la pynpaw shuh shuh ha ka permission ba la shah ban wan kit wat ïa u dewiong na shabar ka jylla ruh ban ïaid lyngba ka South Garo Hills ban pynpoi sha katei ka kad khaïi Gasuapara. Ha ka shithi ai jingbit ka tnad Mining and Geology ruh ym shym la pynpaw satia katno Matric Ton u dewiong u don ha kata ka jaka lum thup ha Gasuapara bad kane ka pynpaw ba ka dei ka jingthmu ban ailad ïa ka jingkhaïi dewiong beaiñ ba kan ïaid na katei ka kad khaïi.
La ong shuh shuh ba dang shen ka ïing bishar High Court jongka jylla ka la shim bishar hi ïa kane ka kam khaïi dewiong beaiñ hadien ba ki nongbishar jongka ki la leit ban jurip bad lap ba ka don ka jingtih bad khaïi dewiong beaiñ ha ka jylla.Ka ïing bishar ka shim bishar ym tang ba ka jingtih dewiong liew khnai ka long kaba ma kaba la shim bun ki jingim briew bad khamtam eh ba ka sorkar jylla kam shym la pyntreikam hok ïa kita ki hukum ba la pynmih da ka ïing bishar Supreme Court bad ka National Green Tribunal.
Ha ka jingshisha ka ïing bishar NGT ka la thung ïa ka Committee ka ban pyntreikam ïa ki jingbthah jongka bad jongka SC kaba la khlieh da u Justice B.P Katakey hynrei haba ka sorkar kam shym la shim khia ban pyntreikam ïa kiba bun ki jingai jingmut jongka Committee ula ïehnoh ïa kane ka kam Chairman. Mynta ka ïing bishar High Court ka la thung biang ïa une u nongbishar ba la shongthait ban bud dien la ka sorkar jylla ka pyntreikam hok ne em ïa ki jingbthah jong ka ïing bishar Supreme Court bad NGT. Kumta ha kane ka jingujor la pynpaw ba namar ba ka mukotduma ka dang sahteng ha ka ïing bishar High Court bad ba u Justice B.P Katakey ruh um pat ïoh ban ai ïa ka kaiphod ba malu mala sha ka ïing bishar, kumta ban ai hukum ne ai jingbit ïa kano kano ka kompani ban shalan dewiong sha Bangladesh ka long ka bym dei satia bad dei ban pyndam noh ïa kane ka jingai jingbit.
La pynpaw shuh shuh ba shwa ban ai jingbit ïa ka JMCPL ban shalan dewiong sha Bangladesh ym shym la leit lum jingkheiñ katno MT u dewiong u don ha kata ka jaka ba ka kam ba la lum thup ïa u dewiong. Nalor kata la kynnoh ba u trai jongkane ka komapni u dei uba la shah kynnoh ba u leh bun ki kam beaiñ ha ka khaïi pateng.
Kumta halor kane ki seng bhalang lem bad u Kingstone ki dawa na ka Chief Secretary ban pynsangeh mardor ïakane ka jingai jingbit ia kane ka kompani bad kumjuh ruh ïakatei ka SOP ba la pynmih da u DC.