Wat ailad ba ki khubor bym sngewtynnad kin jia biang ha Robert Hospital: Prestone

Shillong, Jylliew 28: U Myntri Rangbah Symbud u Bah Prestone Tynsong, u la maham ba ka Robert Hospital, Jaïaw kam dei shuh ban dang pynjia biang ki jingjia ki bym sngewtynnad kumba la jia ha ki snem kiba ladep.
“Nga kyntu ïa ka Governing Body bad baroh kiba donkti ban pynïaia ïa ka Hospital, wat nym wahrah biang ïa ka histori jong ki jingjia jong ki khubor ki bym sngewtynnad”, la ong u Bah Prestone haba kren kum u Kongsan ha ka jingplie ïa ka jaka rung kaba la shna thymmai bad pynitynnad lyngba ka jingnoh synñiang ka ïïng ka sem u Dr.. DD Lapang.
Haba la kdew ïa kaei kaba la jia ha kane ka Hospital kaba la dap shi spah snem ka rta, u Bah Tynsong, u la ong, “Haba nga ïohi ïa ki khubor kiba la jia ha kane ka Hospital ha kine ki snem baladep nga dap da ka jingsngewsih kabym lah shuh ban batai”, u la ong, bad khot ruh ïa baroh ban phai sha U Blei ha ki jingduwai ba un ïalam bad btin lynti ha ka jingpynïaid ïa kane ka Hospital.
Hynrei u Myntri Rangbah Symbud ka jylla, u la ai jingïaroh ruh ïa kane ka Hospital kaba la ïatreilang bad ka sorkar ha kine ki arsnem baladep ha ka jingïakhun pyrshah ïa ka jingpang Coronavirus. Dei namar kane ka daw ba ka sorkar ruh ka la pynshna ïa ka Oxygen Plant ha kane ka Hospital bad ha kiwei kiwei de ki Hospital shimet namar ka jingïadon bynta jong ki ha kane ka thma pyrshah ïa kane ka Hospital.
U Bah Tynsong, u la pynkynmaw ruh ïa ka jingjia ha u snem 1979 por ba jur ka jingïakhih ha nongbah Shillong ba kumno ki la wanrah ïa uwei u briew uba mynsaw uba ki la lap na surok Mawkhar bad ka Robert Hospital ka la pdiang ban sumar ïa u bad dei ynda hadien ki sa tip ba une u briew udei na Kolkata.
U Bah DD Lapang, uba la wan lang ryngkat bad i kurim jong u, i Kong Amethis Blah, u la ong ba kande ka Hospital ka la ai ka jingshakri kaba khraw ïa ki paidbah ha kine ki shispah snem ba la leit noh. “Kadei ka Hospital kabym ju leh shiliang ïano ïano ruh. Baroh u jaitbynriew u wan sumar ha kane ka Hospital”, la ong u Bah Lapang.
U Myntri Rangbah barim ka jylla, u la ïathuh ba ka daw ba ka ïing ka sem jong u, ka la noh synñiang sha kane ka Hospital ha kane ka jingdap shi spah snem, kadei namar ba dei ha kane ka Hospital ba u kurim jong u, i la lait na ka jingïap ha ka por ba kha ïa i khun nyngkong da ka jingsumar u Dr. Huges bad kiwei kiwei bad da ka jingdon ryngkat U Blei.
Ha shuwa jong kane, u Bah Prestone ryngkat ka jingïadon lang u Bah Lapang, u Dr. R. Nongrum, MS ka Robert Hospital u la plie ïa u mawsah kynmaw halor ka jingpynbha ïa kane ka jaka rung kaba la pynkyntang pat da u Rev SS Majaw, Chairman ka Governing Body ka Hospital.