Wat ailad ba i daw barit in pyndait thah ïa ki VDP, ka Pynursla PS ka donkam jingïatreilang: KN Sangma

Shillong Naiwieng, 19 : Ka jingjyllei ki kam sniew naduh ki kam tuh kam thiem, ki kam runar haduh ki kam ïa dih ïa khaïi drok ka la ban khia haduh katta ïa ka tyrpeng ki bor pulit bad kumta ki donkam ka jingïatreilang bad ki bor shnong bor thaw khamtam ki Village Defence Party (VDP) ban teh lakam ïa ki kam sniew ba ha rukom.
Kumta ban pynurlong ïa ka jingthmu, kumba leh ha kiwei kiwei ki shnong ki thaw, ka ophis u SP East Khasi Hills District ha ryngkat ka jingïatreilang bad ka Pynursla Police Station bad ka Village Defence Organisation East Khasi Hills ki la pynlong ïa ka prokram ïamir jingmut ha Dorbar Hall NengGate, Pynursla myn ha ka 15 tarik u Naiwieng, 2024.
Ha kane ka jingïalang la ïa donlang da u KN Sangma, MPS uba dei u Sub-Divisional Police Officer, Pynursla, u Bah J Nonglang, Officer In-charge ka Pynursla Police Station, u Bah B Toi, Circle Organiser VDO East Khasi Hills, u Bah Khrawbok Sohkhlet, Honary Adviser,VDO East Khasi Hills, u Bah Wanlamjingshngaiñ Suting Secretary Dong Nenggate, u Bah RD Rapthap, Circle Organiser VDO East Khasi Hills.
Ki don 58 tylli ki VDP napdeng ki shnong kiba pher kiba hap ha Pynursla Police kiba la dep register bad ki pulit ki ban ai ka jingïatreilang ha ka ban pynneh bad wanrah ka shongsuk shongshngaiñ ha ki shnong ki thaw bad ban teh lakam ïa ki kam sniew.
Ha kane ka sngi ki bor pulit ki la aiti ïa ki tiar kum ki torch light sha ki nongïalam na ki VDP bapher bapher ha katei ka thaiñ. Kiba la ai jingkren ha kane ka sngi ki la pynpaw ka jingsngewkhia halor ka jingsdang kynrei ha ka thaiñ.
Na ka liang u KN Sangma, SDPO Pynursla u la ong ba ki dkhot VDP lada ki kwah ban shah hikai lang bad ki pulit ki lah ban shim bynta lang ha kaba ki lah ban ïaid pahara ryngkat ha ki jaka marjan.
U la ong ba tang ki pulit kin nym lah ban teh lakam ïa ki kam sniew ba har rukom bad kumta ka donkam bha ba ïatreilang ban rat dyngkhong khamtam u drok.