Wat aidaw shuh, pynbna paidbah noh mardor ïa ka kaiphod tohkit shah siat ïap u Bah Cherish

Shillong, Jylliew, 3: Ki nongïalam jong ka Sur ka Bri u Hynñiewtrep (SBH) ha ka sngi Thohdieng ka la dawa ïa ka Sorkar Meghalaya Democratic Alliance (MDA) ba la ïalam da ka National Peoples Party (NPP) ba ka dei ban pynbna paidbah ïa ka kaiphod tohkit halor ka jingshah siat ïap jong u Bah Cheristarfield Thangkhiew ha ka 13 tarik, Nailar, 2021.
Kane ka jingdawa ka long hadien ba kane ka kynhun ka la leit ban ïakynduh ïa ki bahaïing hasem jong u Bah Che ha ingsah kaba don ha Mawlai Kynton Massar, Shillong.
Ha ka jingïakren bad ki lad pathai khubor, u Chairman jong ka Sur ka Bri u Hynñiewtrep u Bah Donboklang Kharlyngngdoh u la ong, “naduh kaba sdang hadien kato ka jingjia, ka jingdawa jong ngi ka long ban ïoh ïa ka jingbishar kaba hok bad ban pynshitom ïa kiba donkti ban siat ïap im im peit peit ïa u Bah Cheris.”
“Hadien ba ngi la ïohi ïa ka jingaiti ïa ka kaiphod da u Justice T. Vaiphei ha u Myntri Rangbah ha ka 20 tarik, Jymmang, kum ka kynhun ka bym ju ïaid lait ngi sngewdei ban kynduh biang ïa ka ïing ka sem jong u Bah Che mynta ka sngi hadien ba ka Sorkar kam shym la pynbna paidbah ïa ka kaiphod tohkit,” u la ong.
“Ha ka jingïakren bad ka ïing ka sem jong u Che, ki la ong ba kim pat ïoh satia ïa ka kopi jong ka kaiphod tohkit. Ka jingïakynduh mynta ka sngi ïa ka ing ha sem ka long ba ngin ïai ïaleh ngin ym sangeh,” u la bynrap.
U la ïathuh ruh ba ka jingsngap jar jong ka Sur ka Bri u Hynñiewtrep baroh shikatto ka dei namarba ka dang don ka jingtohkit.
U la pynpaw ruh ka jinglyngngoh halor ka jingpynslem jong ka Sorkar MDA ban pynbna paidbah ïa kane ka kaiphod tohkit wat hadien ba u Justice T. Vaiphei u ladep aiti ïa ka kaiphod tohkit sha u Myntri Rangbah ka Jylla.
“Don aiu ha lyndet, naduh ka 20 tarik u bnai Jymmang, 2022 haba phi la ïoh pdiang ïa ka kaiphod na ka Meghalaya Human Rights Commission (MHRC), ngi la shu ïohsngew ba la phah pat sa sha ka Political Department,” la kynthoh une u Chairman jong ka Sur ka Bri u Hynñiewtrep.
“Hato ka ka jingtohkit ïa ka ïing, ka jingwan dkhat jubor jong phi ïa ka jingim jong une u rangbah (Bah Cheris), hato phim hun tang ha ka MHRC mynta pat phi la phah sa sha ka Political Department?” la buh jingkylli u Bah Kharlyngdoh bad bynrap, ‘ngi sngewsih bad ngi sngew ba kane ka jingleh jong ka Sorkar MDA, ïoh lehse nga imat ki don jingthmu ban pynsniew ïa kane ka jingtohkit. Ngi kyntu ïa ka Sorkar MDA ba sngewbha ban pyllait noh ïa ka kaiphod ba ngi kum u paidbah ngin ïohi bad ngi kwah kumba ngi ong.”
Haba maham ïa ka Sorkar, une u nongïalam ka Sur ka Bri u Hynñiewtrep u la ong, “ngim buh por, ngi kwah ban ong kylla ïa ka Sorkar hato phi kwah ïa ngi ba ngin mih biang sha surok ban dawa pynbna paidbah ïa kane ka kaiphod.”
“Sngewbha, haba ka jingtohkit ka ladep pynbna paidbah noh ïa ka jingtohkit, balei phi dang ai sa sha ka Political Department? Hato don eiei ban tah sia lieh ne ban pynbeit ne ban pynsniew? Kata ka dei ka jingkylli jong ka Sur ka Bri u Hynñiewtrep lada ngi ïohi ba ka long kumne kumtai bad ka kyllaiñ ngi kyrpad ïa ki paidbah ban long kiba la khreh kumba ngi la mih sha madan ban dawa tohkit, sa shisien ngin dawa ban pyllait noh ïa ka kaiphod kaba u Justice Vaiphei u la aiti sha ka Sorkar,” la maham tyngeh u Bah Kharlyngdoh.
“Lada kane ka kaiphod kan long ka kaiphod kaba pynrem ïa u nongshah pynïap (Bah Cheris) bad phi pyrto ïa u nongpynïap (Pulit) ïoh lehse kan sa khie biang ka thma hapoh ka jaidbynriew bad yn sa wan shuh shuh ka jinglynshop na ki bor ka mariang ki ban sa ktah shimet shimet ïa phi kiba don hapoh ka Sorkar,” u la kynthoh.
U la ïathuh ba ha ka jingïasyllok, ka ing ka sem u Bah Cheris ruh ki la pynpaw ïa ka jingshahniah ha kane ka jingtohkit.
“Ngi kwah ban ïohi ba ïa kito kiba donkti dei ban pyni noh. Lada dei uno uno u shakri Sorkar ruh dei ban wengkam shi syndon. Sngewbha ko Myntri Rangbah wat aidaw shuh da kumwei pat, mynta phi la aidaw ba ka dang don ka jingtohkit bad mynta pat phi ong ba ka dang don ha ka Political Department? Kine ki dei tang ki jingaidaw suda,” u la ong.