Shillong Naiwieng 15 : U MDC ka Mawlai u Bah Teiborlang Pathaw u la pynpaw ka jingsngewkhia halor ka jingïai jia ki jingjia ba duh ei ki mynsiem briew na ka jingshah tynrah kali bad shah tynrah ha ki ar shaka ha kylleng ki bynta jong ka jylla.
Kumta, halor kane u la kyntu ïa ki bor ba die khmih ban buh noh da ki speed breaker ha ki jaka ba donkam ryngkat ka jingkyntu ïa ki samla kiba niah ïa ki ar shaka ban long kiba adkar khnang ban lait na ki jingma.
Ha u kyrwoh, u Bah Teibor u la phah ka khubor sngewlem sha ka ïing ka sem jong ka longkmie kaba la khlad ha ka jingjia kaba la jia ha Mawlai Mawdatbaki ba u Blei un ai ka jingtngen ïa ka ïing ka sem bad ki baieid ba thoiñ baroh.
Une u MDC ka Mawlai u la kyrpad ruh ïa ki kmie ki kpa ban phikir ïa la ki khun ki kti khamtam ban nym ai lad ïa ki ban ñiah, la ka dei ka kali ne ar shaka haba kim pat dei ka rta ban ñiah.
