Wat ai jaka rieh ïa ki poiwir ba shah pynpra ki dukan bad ïing ha Assam, kyntu ka FKJGP bad KSU

Nongpoh, Nailur, 06: Tang hadien ba ka sorkar Assam ka la pynpra naphang ïa ki ing ki sem, ne ki dukan ba la wan shna beain ha ki jaka jong ka sorkar ba hap harud ka surokbah National Highway-6 ha Ri Bhoi, ki ar tylli ki seng ka FKJGP bad ka KSU na Byrnihat Circle ki la kyntu jur ïa ki bor shnong ba kin long kiba peitngor bad ba kin nym dei ban ai jaka lada ki wan ba riehtngen sha ki shnong ba hap ha Meghalaya.
Kum ban pynpaw, ka sorkar Assam ka la pynpra naphang ïa ki ïing ki sem bad ruh ki dukan kata naduh na Jorobat shaduh sha Byrnihat ha ka liang jong u pud u sam ka Assam bad kane ka jingshah pynpra ka dei halor ka Nongrim ba ki la wan ban shna ïing ne dukan ha ka jaka jong ka sorkar khlem da ioh bor sati ana ka sorkar ne wat na ka NHAI.
Haba ïa kren bad ki lad pathai khubor, u Senior Vice President ka FKJGP North Khasi Hills District u Bah Lumlang Mawnai bad u General Secretary ka KSU Byrnihat Circle, u Bah Maitlynti Klein, ki la ong ba na katei ka jingshah pynpra ïing bad ki dukan ha ka sorkar Assam ka la long ka jingma, namar kitei ki phetwir ki lah ban wan riehtngen sha ki shnong ba hap ha Ri Bhoi jong ka jylla Meghalaya.
Ki la buh ka jingmaham ïa ki bor shnong naduh na Khanapara sha Byrnihat ba kin long kiba peitngor bad ba kin nym dei ban ai jaka ïa ki phetwir, kaba dei hadien ba ki la duh ïa ki ïing ki sem ba ka sorkar Assam ka la pynpra na ka jingleit shong beain ne shna beain ha ki jaka jong ka sorkar Assam.
Ban khanglad ïa ki bar jylla ban poi sha ki shnong ba hap ha ka jylla Meghalaya ha Ri Bhoi District, na ka liang kitei ki nongïalam ki la kyrpad jur naduh u Rangbah Shnong, ki samla bad ki paidbah nongshong shnong ryngkat ki seng bhalang ba kin ïa trei lang bad ha kum kane ka por ngi hap ban peitngor namar ioh wan poi kitei ki phetwir sha ki shnong ba hap ha ka jylla Meghalaya.
Ki la buh ruh ka jingmaham ïa ki trai ïing ba kim bit ban ai wai ïing ïa kino kino kino ki bar jylla ba wan wad jaka riengtngen sha ki shnong ba hap ha ka jylla Meghalaya bad kum ka seng lada ki lap ïa kiba leh pyrshah kim banse ban shim da ki lad kiba tyngeh.
Ki la kyrpad ruh ïa ka bor synshar district bad ka sorkar jylla ba kin hap ba shim khia lem ïa kane ka bynta, namar kane ka lah ban ktah ïa ka jingwan rung kynthep ki bar jylla sha kane ka jylla, namar kumba la ioh lum jingtip kitei ki briew ba shah pynpra ïing bad ki dukan, ki dei kiba la shu wan shong beain ha Assam bad ki lah ruh ban dei ki nongpoi wir na kiwei ki jylla ne ki ri, ki la bynrap.