Nongstoiñ, Nailar 1: Ka jingjyllei bad ka jingsdang pur sted jong u jingdih pynbuaid u ba shyrkhei ïa u ba la tip kum u Drok, kumjuh ruh ka jingsdang bun ka jingshongkha khynnah ha ka imlang sahlang, ka la pynshong syier shisha ïa ki kmie ki kpa, wat ïa ki nongsynshar shnong ne hima na ka bynta ka lawei ki khun samla, ha baroh kawei ka bri u hynñiewtrep.
Kumba long mynta, u Drok u la sdang ban suh thied ruh wat shaduh ki shnong nongkyndong ha kine ki sngi. Ka daw ka dei namar ka jingbym pyllut por jong ki kmie ki kpa, ban hikai ne sneng ïa la ki khun, bad ka jingshongkha khynnah kaba la sdang ban bun ha ka imlang sahlang. Nalor nangta bun na ki longïing ki duna ha ka ïoh ka kot bad kumjuh ruh ka dei namar ka jingduna ha ka jingnang jingstad.
Haba ïadei bad katei ka phang, ka dorbar shnong Mawthawñiaw kawei na ki shnong ha ka thaiñ Nongstoiñ, ha ryngkat ka jingïatreilang bad ka ophis CDPO Nongstoiñ, kumjuh bad ka tnad pulit Nongstoiñ, ha ka sngi saitjaiñ ka la pynlong ïa ka jingai jinghikai haba ïadei bad kitei ki ar tylli ki phang ba kumno yn lah ban lait na kitei.
Ïa katei ka jingïalang la pynlong ha dorbar hall jong ka shnong Mawthawñiaw bad la ïadonlang ruh I Kong B.Thabah legal cum probation officer (LCPO) DCPO Nongstoiñ, kong L.Siangshai Women Police Sub Inspector Nongstoiñ, u bah A.Warjri Sub Inspector Nongstoiñ bad la pynïaid ïa katei ka jingïalang da u tymmen basan B.Jyrwa kum u shongknor jong katei ka jingïalang.
Na ka liang ki nongkren ki la pynshai bad ai jingmut halor ki lad kumno ban leh halor kine ki jingeh kiba don ha kine ki sngi. Kaba kongsan ka long ban don ka jingïatreilang ha baroh ki liang naduh ki bor shnong, ki longkmie longkpa, ki khun samla shnong ha ryngkat ki bor ba dei peit kiba don ha Nongstoiñ. Ka jingïatreilang ha baroh ki liang ka long kaba kongsan tam ban jop ïa ki jingeh bad jingsniew ha ki shnong ki thaw.
Ka kong B.Thabah ka la ban jur halor la jingdonkam jong ki kmie ki kpa ban peit bniah ïa la ki jong ki khun, khamtam ha kaba kum kane ka juk pyndonkam mobile naduh u khynnah haduh u rangbah. I la ong ba ki kmie ki kpa kiba kha ïa la ki khun, ki dei ban shim ka jingkitkhlieh bad ki dei ban sngewthuh ba ka mobile phone hi kam lah ban sneng khun, hynrei ka dei ka kamram jong ki kmie ki kpa ban pynbeit bad ïalam ïa ki.
