Wat ai ba ka bor pisa kan khanglad ïa ka jingthrang pynkylla dur ïa ka jylla

Shillong, Naitung 10 : Ka Jylla Meghalaya ka la pynkhreh shaid shaid ïa ka jingwan jong ka samoi ban jied noh ïa ki nongmihkhmat kiba thymmai sha ka ïingdorbar Thaw Aiñ ka Jylla ne Elekshon MLA, ka ban long ha u snem 2023. Ki paid nongshongshnong ki la sdang ban ïakren ïa khana sharum shaneng ïa ka jingdonkam ka Jylla ïa ka “Jingkylla” ha ka synshar khadar ka ban kyntiew ïa ka Jylla bad ia ki nongshongshnong ha baroh ki liang.
Ka jingïakren ka la mih ruh halor ka jingdonkam jong ka Jylla ban sei noh da ki Nongmihkhmat ki ban long ki Nongthaw Aiñ ha ka jaka ki Nongmihkhmat kiba pyrkhat beit thik tang kumno ban jop ïa ki elekshon bad buh shadien ïa ka kamram ba ki dei ban leh ha kaban ïada, kyntiew, pynkhlaiñ ïa ka Jylla ha baroh ki liang.
“La 50 tylli ki snem ngi la ïoh ïa la ka jong ka Jylla bad ngi la ïoh bat hi halade ïa ka synshar khaddar kaba pura, hynrei ngim ïohi bad ngim lah len ba kam don satia ka jingkiew hynrei ka jinghiar jong ka Jylla” ong u Bah Lambokstar Marngar, President ka Khasi Students Union (KSU) haba ïakren bad u nongthoh khubor.
“Ka jingbym lah jong ka Jylla ban kiew ka dei namar ka jingsynjor palat ka pyrkhat pyrdaiñ jong ki paidbah kiba jied ïa ki Nongthaw Aiñ ki ban pynwandur bad ohshrong ïa ka Jylla da ki aiñ ki ban kyntiew bad ban ïada ïa ki nongshong shnong khamtam ki trai ri trai muluk” ula bynrap.
Haba pynpaw ba Jylla Meghalaya kala donkam mynta ban jied noh da ki Nongthaw Aiñ ki ban long ki “Statesman” (ki nongthaw aiñ kiba iohi jngai, kiba don ka Mission bad kiba don ka mynsiem ban shakri naduh mynsiem bad kyntiew ïa ka Jylla) ym shuh ki Nongsam skhim, une u Nongialam ka KSU ula ong ‘Lada ngi kwah ba ka Jylla kan khlaiñ, kan kiew irat bad ba ngin ïohi shisha ia ki Policy treikam bapher bapher kiba ïaid kat kum ka jingdawa ka por bad jingangnud u paidbah, kala dei ka por ban jied ia ki Nongthaw Aiñ ym shuh ki Nongsam Skhim”.
“Ka jingbym don kum kine ki briew ha ka Synshar ka khaddar ne ban thaw Aiñ, ka dei ka daw ba pynbor ïa ki Sengbhalang ban hap mih sha surok ban dawa ïa ki Aiñ ki kanun ki ban ïada ïa ka Jaidbynriew. Ki jingdawa kiba la bun bah hynrei baroh kila sahkut ha suiñ namar ka jingbym don ka Jylla ïa kum kine ki Nongthaw Aiñ kiba buh ïa ka Jylla bad ka Jaidbynriew hakhmat ban ïa ka myntoi shimet” ula ong.
“Ki paidbah kin hap ban sngewthuh bad buh jingkylli shimet shimet ba ngin jied ïa ki Nongsaiñ dur na ka bynta ka pateng ban wan lane ïa ki briew ki thrang bad angnud ban jop biang ha ka elekshon ban wan” ula bynrap.
Une u Nongïalam ka KSU ula ong ba ka jingtrei borbah jong ka pisa ha ka Elekshon ka dei ka daw bah ba ka Jylla kam lah ban sei ïa ki Nongthaw Aiñ kiba tbit ne ki Statesman haba ong “Katba ka Jylla ka dang jied ïa ki nongmihkhmat lyngba ka pisa, ka synshar khaddar kam dei shuh kaba ïakren ïa ki aiñ hynrei kaba ïakren ïa ki business”.
“Lada ki paidbah ki sangeh noh ïa ka jingïakren pisa ha ka por elekshon, khlem pep ki jingkylla kin sa wan ha ka synshar khaddar ha Jylla bad ka Jylla kan sa ïohi ruh ia shibun ki jingkylla ha baroh ki liang” ula ong.
“Ka Jaidbynriew ka don kyrhai ki briew kiba stad, ba shemphang, kiba ieid ïa ka Ri bad ka Jaidbynriew bad kiba thrang ban shakri kum ki Nongthaw Aiñ, hynrei tang namar ka jingbym don pisa, kala pynbor ïa ki ban shu hun jia kat kaba jia, long kat kaba long” ula bynrap.
Haba pynpaw ba ka por kala dawa ïa ki Nongshongshnong ba kin pyndonkam hok ïa ka iktiar bad ban pyrkhat bha ïala ka jong ka lawei, u Bah Lambok ula ong “Ngim dei shuh ban ïapeiñ ïa ka jingtbit (quality) jong ki Nongthaw Aiñ ha ka bor jong ka pisa ha kane ka kynti jied nongmihkhmat ban wan ha Jylla ne ha kiwei kiwei ki jingsngew kum ka jingsngew para niam, para kur, para thaiñ bad kiwei kiwei”.
“Lada ngi ïakren ïa ka jingtbit (Quality) jong ki Nongthaw Aiñ, kala dei ka por ïa ki paidbah ba kin da ïit bad da thew bha ïa kiba kum kino ki briew ba dei ban phah sha ka ïingdorbar Thaw Aiñ ka Jylla”ula ong haba bynrap “Kane ka long kaba donkam tam ha ka kam jied nongthaw Aiñ khnang ba kan nym mih shuh ka jingïakhnium na ka por sha ka por”.
Haba pynsngew ïa kane ka juh ka sur, u President ka seng Hynniewtrep National Youth Front (HNYF) Bah Sadon Blah ula ong “Ka jingbym hun bad jingïaknium jong ngi ki paidbah ha baroh kine ki 50 tylli ki snem ka dei namar ba ngi ki paidbah ngi pynlong ïa ka elekshon kum ka tamasa ba lai bnai, ka tamasa ïashad ïakmen, ïaput ïatem”.
“Ka jingkylla hi kan nym wan tang na ki Political Party ne ki Politician kiba dei ki Agent of Change (Nongwanrah ïa ka Jingkylla) ha ka kam saiñ pyrthei lada u paidbah hi um kylla” ula ong haba bynrap “Katba dang ïai long ka tamasa, da lei lei ruh kan ym wan satia ka jingkylla”
“Ngam lah ban kynnoh ïa ki Political Party ne ki Politician ïa kane namar haba u paidbah u long ha kata ka rukom, ki ruh kim banse ban pynhun ïa ka jinglong u paidbah. Kane ka dei ka snur (web) kaba eh ban law ïa u sohkyrdot” ula bynrap.
Halor ka jingdonkam ka Jylla ïa ki Statesman, u Bah Sadon ula ong “Nga nud ban ong ba haduh mynta la 50 tylli ki snem ngim pat ïoh ia u Statesman. Hangne ruh ki don shibun ki daw ba pynlong ïa ka Jylla ban shem jingeh ha kaban sei ïa kita ki Statesman”.
“Kawei ka jingeh hangne ka long ba baroh ki sngew ba ki dei ki Nongïalam kaba lam pat sha ka jingpynpharia ïa ka Jaidbynriew, ïa ki Political Party ha ka kyrteng jong ka elekshon. Ka jingbym don discipline jong ki Political Party ruh ka dei kawei ka daw” ula ong.
Une u Nongïalam ka HNYF ula pynsngew ruh ba kawei pat ka daw jong kane ka dei ka jingpyndonkam ïa ka bor pisa ha ka elekshon haba ong “Kumba long mynta hi, tang ki briew kiba don da ki klur kiba lah ban rung ha ka kam saiñ pyrthei, kyrsum ha ka saiñ pyrthei bad ïohbor ha ka kam saiñ pyrthei. Kane kala khanglad bad ka lynti kan ym plie satia ïa ki briew kiba kwah ban shakri hok, kiba don ka mynsiem ban pynwandur thymmai ïa ka Jylla”.
U Nongïalam ka Federation of Khasi Jaintia & Garo Peopls Bah Eldie N Lyngdoh uba dei u General Secretary kane ka Seng, ula ong “Kine ki Nongmihkhmat ba mynta kim dei atia ki nongïalam kiba peit ïa ka jingeh jong ka Jaidbynriew hynrei kiba peit ïa kane ka kam nongmihkhmat kum ka Business”.
“Ngim lah ban len ïa kane. Katno ngut ki MLA jong ngi mynta kiba dei ki businessman te haei ngin ïoh ïa ka Jylla kaba don jingkyrmen ba kan kiew irat” ula ong haba bynrap “Ngi kyrmen ba ka elekshon MLA 2023 kan don noh ka jingkylla ha ka pyrkhat pyrdaiñ u paidbah nongthep vote khnang ban lah sei ïa ki Nongmihkhmat kiba ïohi jngai na ka bynta ka ri bad ka Jaidbynriew”.
Kat kum ka jingong une u Nongïalam Sengbhalang “Ka jingmih jong ki Businessman Politician ka dei ka daw bah ba ka Jylla kam lah haduh kine ki sngi ban sei ïa ki “Statesman” kiba pyrkhat bad ïohi jngai ïa ka lawei jong ka Jylla bad ka Jaidbynriew”.
U bah Eldie ula ong ba ka jingïalehkai da ka Pisa ha ka kam jied nongmihkhmat ka dei kaba buh jingma kaba khraw bha ïa ka Jaid bynriew. “Kaei hi ngin khmih lynti na ki briew kiba shu thong da ka pisa ïa ki paidbah ban jop elekshon. Ka dei kane ka daw ba ki ishu jong ka Jaidbynriew kila shu sahteng mynta la san phew tylli ki snem”.
“Nga ïohi ïa ka jingma ba hakhmat eh mynta ka long ba ki Politician kila pynmlien ïa ki paidbah da ka pisa haduh ba ki jingkylli kiba mih ïa ki kyrtong ka long shuwa ba haduh katno ki don pisa khlem da buh pat ïa ka jingdonkam ba hakhmat eh ba haduh katno ki ïohi jngai, ka thong ba ki don bad ka mynsiem ban shakri ba ki don ïa ka Jaidbynriew bad ka Jylla” ula ong haba bynrap “Kine kiei kiei ki dei kiba pynkha ïa ki jingeh kiba ka Jylla ka la mad mynta.
Haba pynpaw baka Jylla ka la donkam mynta ïa ki briew kiba shim ïa ka kam Nongmihkhmat ban long ki Nongthaw aiñ ba shisha ym kiba shim ïa ki Constituency kum ki jaka ban kynshew (Invest) ban pynkhie spah, u Bah Eldie ula ong “Ka jingkylli ka mih mynta ba ki 60 ngut ki MLA ba ngi phah sha ïingdorbar Thaw Aiñ, kila leh aiu haduh mynta…kaei ka synniang kaba kila ai sha ka bha ka miat jong ka Jaidbynriew hynrei ngi ïohi pynban tang ki jyrsieh bapher bapher bad kane ka dei ka jingjop jong ki kum kita ki MLA”.
Kine ki Nongïalam Sengbhalang kila pyrta shla ba ki Nongshongshnong ki dei ban kylla thiah kylla dem bad ban pyrkhat sani ba ka jingdie tad dor ïa ki vote jong ki haba jied ïa ki Nongmihkhmat, kam wanrah satia ïa ka jingïohnong bad jingmyntoi jong ka Jylla ne ka Jaidbynriew hynrei ka dei ka jingtim ïa ka lawei bad ka pateng jong ki ban dang wan kiba dei ki Khun ki Kti jong baroh hi ki Nongshongshnong ka Jylla.