Shillong, Nailar, 28: Ka Khun Hynñiewtrep National Awakening Movement (KHNAM) State Youth Wing ha ka sngi u Blei ka la dawa ïa ka Sorkar Meghalaya Democratic Alliance (MDA) ba ka dei ban ban wanrah shwa ïa ka kaiphod hapoh ka Iingdorbar Thawaiñ ka Jylla ynda la aiti da ki Regional Committee ha ka jingïapynbeit ïa u pud u sam ha ka wat kaba ar.
Ki hynriew tylli ki jaka ïakajia pud hapdeng ka Meghalaya bad Assam kiba dang sahteng ban pynbeit ha ka wat kaba ar ki kynthup ïa ka Khanduli bad Psiar, Block 1 bad Block 2, ka Borduar, ka Langpih, ka Nongwah-Mawtamur bad ka Desh Doomreah.
Ha ka 21 tarik mynta u bnai, u Myntri Rangbah ka jylla Meghalaya u Conrad K. Sangma bad u Myntri Rangbah ka Assam u Himanta Biswa Sarma ha ka jingïalang kaba la long ha Guwahati ki la rai ban thaw noh ïa ki lai tylli ki Regional Committee hapoh 15 days, khnang ban ïapynbeit noh ïa u pud u sam jong ki hynriew tylli ki jaka kiba don hapdeng ka jingïakajia pud.
Ha kane ka jingïalang, la rai ruh ban kynthup lang ïa ka Karbi Anglong Autonomous Council (KAAC) ha ka Regional Committee.
Dang shen u Symbud Myntri Rangbah ka Jylla u Bah Prestone Tynsong u la pyntip ba yn sa kynthup lang ïa ka Khasi bad Jaiñtia Hils Autonomous District Council ha ka Regional Committee ka ban sa thaw noh shen na ka bynta ban ïasyllok bad ban ïoh ïa ki dulir kiba pynshisha ïa ka jinglongtrai halor ki jaka kiba hap hapoh ka jylla Meghalaya.
Nalor ki ADC, ha ka Regional Committee, u Bah Tynsong u la pyntip ba yn sa kynthup lang ïa ki Rangbah Shnong, ki Hima, ki Dolloi.
“Haba ngi la ïohi ba ka Sorkar Jylla ka la sdang sa ïa ka wat kaba ar ban ïa pynbeit ïa u pud u sam hapdeng ka Assam bad Meghalaya, ngi kum seng ngi sngewdei ban kren shai halor kane ka phang shwa ban ïasoi ïa ka Memorandum of Understanding (MoU) hapdeng ki ar ngut ki Myntri Rangbah, khnang ba lada mih ki jingleh bakla lane ka jingleh donbor bad ka jingbymhun jong ki paidbah, ka Sorkar kam lah shuh ban ong ba khlem ai jingmut ha shwa ban soi,” ong u kyrwoh ba la phah da u President ka KHNAM-State Youth Wing u Bah Thomas Passah.
“Ha kane ka wat kaba ar jong ka jingpynbeit pud la kynthup ruh ïa ki lai tylli ki jaka kiba kham kongsan, kata, ïa ka Block-1 bad Block-2 bad ïa ka Langpih,” u la ong.
“Namarkata ka seng ka dawa ba ka Sorkar ka dei ban wanrah ha ka Iingdorbar Thawaiñ ïa ka kaiphot jong ki Regional Committee shwa ban poi sha ka jingïasoi ïa ka MoU, khnang ban kiar na ki jingkynrum kynram. Lada donkam ban khot da ka Special Session ruh ïa ka kaiphot dei beit ban ïatai shwa haduh ba poi sha ka jingsngewthuh bad ban ïoh ïa ka jinghun na baroh,” ong une u nongïalam ka Seng.
