Shillong, Iaiong 11 : Ka North East Indira Gandhi Regional Institute of Health Medical Sciences (NEIGRIHMS) sa shisien ka la paw biang ka nam ka burom da ka jingïoh pdiang khusnam ki doktor jongka.
U Dr Tanie Natung Professor bad Head Department of Ophthalmology) u la ïoh ïa ka khusnam Sushruta Samman. ïa kane ka khusnam la ai sha u ha ka jingïakynduh kaba san jongka National Assembly Forum of Ophthalmology Professor of India (FOPI),Pan India, HOD Ophthalmology Group kaba la long ha Raigarh, Chhattisgarh ha ka 2 bad 3 tarik Iaiong 2022.
U la ïoh pdiang ïa kane ka khusnam namar ka jingtbit jongu ha kaba ai jinghikai bad pyntbit ïa ki samla pule MBBS, Post Graduate (MD/MS) kum u Professor bad HOD bad u long ruh uba tbit ban puid khmat.
Ka khusnam Sushruta Samman ka dei ka khusnam kaba heh bha ba la pynkup da ka FOPI ïa ki Professor ka tnad Ophthalmology kiba tbit bad aiti ha ka kam ban ai jinghikai bad pyntbit ïa ki samla pule. U Prof (Dr) T Natung u dei uba la ïoh pdiang ruh ïa ki khusnam International Council of Ophthalmology bad Delhi Ophthalmological Society. U dei uba tbit bha ban puid khmat (Phaco-refractive surgeries and Strabismus Pediatric Ophthalmology.).
Ha kawei pat ka bynta ka NEIGRIHMS ka la ïoh ïa ka nam ha ka kyrdan ba nyngkong ha ka ri baroh kawei ha kaba ïadei bad ka jingrakhe ïa ka World Oral Health Day kaba la long ha u Lber 2022 ha kaba palat 150 tylli ki Dental College bad Institute ha baroh kawei ka ri ki ïashim bynta. ïa ka prorkam ban ai ïa kane ka khusnam ruh la pynlong ha Nirman Bhawan, New Delhi ha ka 8 tarik Iaiong 2022 bad ïa ka khusnam la ai da u Dr Sunil Kumar DGHS, jongka tnad ealth and Family Welfare.
ïaka World Oral Health Day la pynlong da ka tnad Dentistry jongka NEIGRIHMS hapoh ka jingïalam u Professor S.Vijay Singh uba dei u khlieh jong kane ka tnad. Ki porokram ki kynthup naduh ka jingai jingkren lyngba ki radio, ka awarness run campaign, poster competition bad bun kiwei kiwei ki prokram kiba la pynlong ha ki skul bad ki ïing sah ki tymmen ki kro, kynthup ruh ka jingsam ïa ki brut shut bniat, ki dawai shut bniat bad ter ter.
Ka NEIGRIHMS ka la ïoh ruh ïa ka khusnam Ayushman Utkristata Puraskar 2021 namar ka dei ka hospital kaba iarap bun eh ban ai jingsumar ïa ki nongpang baduk napdeng ki jylla kiba rit bad ïa kane ka khusnam ruh la sam ha katei ka jingïalang ha ka 8 tarik iaiong 2022 ha nongbah Delhi. Ha kaba pyntreikam ïa ka Ayushman Bharat -PMJAY kaba la pynïasnoh lang bad ka MHIS na ka bynta ki nongpang khamtam kiba bud, ka NEIGRIHMS ka dei kawei na ki hospital ha ki jylla kiba rit kaba wan nyngkong eh ka jingbun kiba ïoh jingmyntoi na kane ka insurance skhim.
