Wanrah ka Sorkar da ka Laboratory ha Kyrdemkulai ban pynkha symbai ïa ki Langbrot bad ki Blang

Nongpoh, Jylliew 08: Ban pynkhlaiñ ha kaba pynmih bun ïa ki jingri khamtam na ka bynta ki Langbrot bad ki Blang ban kyntiew ïa ka ioh ka kot ki nongrep, ka sorkar jylla lyngba ka tnad Animal Husbandry and Veterinary ka la wan rah da kawei ka Laboratory ba la tip kum ka Regional Semen Production Laboratory and Semen Bank (RSPL&SB) ban tei ha Kyrdemkulai, Ri Bhoi District.
Ïa kane la sakhi mynta ka sngi, hadien ba u Bah A.L Hek, Myntri sorkar ba dei peit ïa ka tnad Animal Husbandry and Veterinary u la wan ban buh ïa u mawnongrim na ka bynta ban tei ïa katei ka laboratory kaba long ka thong jong ka sorkar ban kyntiew ïa ki kam ri jingri.
Ha kane ka sngi, la sakhi lang ruh da ka jingdon lang u u Bah F.R Kharkongngor, Principal Secretary ka tnad Animal Husbandry & Veterinary, ka Dr. M. Kharchandy, Director, kiwei ki ophisar bad ki nongri jingri na Ri Bhoi bad na kylleng ka jylla.
Kum u kongsan haba kren ha kane ka sngi, u Bah A.L Hek kum u myntri sorkar, u la ai khublei kyrpang ïa ka tnad Animal Husbandry and Veterinary bad baroh ki ophisar, ha kaba dei lyngba ka jingïatrei lang la lah ban wan rah ïa kane ka Laboratory, kaba long kawei pat ka sienjam ban pynkha symbai ïa ki Langbrot bad ki Blang na ka bynta ban ioh jingmyntoi ki nongri jingri hapoh ka jylla.
U la ong ruh ba ka sorkar ka kan sa shim khia ban pynsted ïa ki kam khnang ba kane ka jingbuh mawnongrim kam dei ban kut tang mynta ka sngi bad kane ka jingwan rah ïa katei ka Laboratory ba la tip kum ka Regional Semen Production Laboratory and Semen Bank ka ban long shisha ka jingmyntoi ïa ki nongri jingri.
Shuh shuh, u la bynrap ruh da kaba ong, ba ka sorkar kan pynsted ïa kane ka kam bad ban ïatrei ryngkat ruh na baroh ki liang bad khlem pep lada don ka jingïatrei lang kane ka jingwan poi kane ka Laboratory kan kyntiew ym tang ïa ki kam ri jingri bad kan kyntiew ruh ïa ka ioh ka kot jong ki nongri jingri, u la bynrap.