Shillong, Naiwieng, 16: Da kaba buh hakhmat ïa ka thong ban ai ïa ka jingsumar kaba bha tam sha ki nongpang ha ka thaiñ Shatei Lammihngi, ka NEIGRIHMS Hospital ha ka sngi Saitjaiñ ka la wanrah ïa ka mashin Extracorporeal Shock Wave Lithotripsy (ESWL) ba thymmai ban sumar ïa ki nongpang kiba don maw ha u khyllai.
Kane ka hospital ka la sdang ïa ka jingai jingsumar lyngba ka ESWL ban pynpra ïa ki maw ha u khyllai naduh u snem 2013, hynrei da ka jingwanrah ïa ka mashin ba thymmai ka Dornier Delta III Pro ki nongpang kin sa ïoh ïa ka jingsumar kaba kham paka.
U Director ka NEIGRIHMS u Prof. Nalin Mehta uba la plie paidbah ïa ka mashin ha Department of Urology u la ong ba kane ka mashin ka dei kaba lai ba la wanrah hapoh ka ri India.
U la ong ba kane ka mashin ym tangba kan ai ïa ka jingsumar kaba katkum ka jingïaid ka por na ka bynta ki nongpang kiba don maw ha u khyllai hynrei yn sa pyndonkam ruh ban ai jinghikai pyntbit ïa ki doktor na kiwei kiwei ki jylla jong ka thaiñ shatei lammihngi.
U Director u la ïaroh ïa ka tnat kaba la trei shitom ban pynjanai ïa ka jingai jingsumar ïa ki nongpang.
