SHILLONG, Naiwieng 13: Ka Wrestling Association of Meghalaya (WAM) ha ka jingïatreilang bad ka tnad ïalehkai jong ka Sorkar jylla Meghalaya, kumjuh ruh bad ka Meghalaya State Olympic Association (MSOA) da kaba ïasnohktilang bad ka Sportality Pvt Ltd, ka la pdiang sngewbha ïa ar ngut ki Coach kiba la shemphang bha ha ka jingïalehkai Judo bad Wrestling, u Takeshi Kuboya bad u Shingo Harada jong ka ri Japan.
ïa kine ki arngut kiba dei ki High Performance Wrestling Coach ka Sportality, la pdiang burom ha ka jingïalang ba la pynlong ha Shillong Press Club ha ka 13 tarik Naiwieng, 2025, ha ka jingïadonlang u President ka Wrestling Association of Meghalaya (WAM) u Bah Isaiah Kharmawphlang, u President ka MSOA Bah John F Kharshiing bad u Director ka Sportality Pvt Ltd u Vikram Malik.
Ka jingwanpoi jong kine arngut ka long shi bynta jong ka jingpynkhreh jong ka Jylla ïa ka National Games ba kan sa pdiang bad pynlong ha u snem 2027 bad kumjuh ruh ban pyntbit bad pynkhlaiñ ïa ka lawei na ka bynta ki nongïalehkai Judo bad Wrestling ha ka jylla Meghalaya.
Khyndiat haba phai sha u Shingo Harada, u dei uwei na ki nongïalehkai wrestling ba kynsai jong ka ri Japan ha ka Olympic, bad uba bat ïa ka nam lahduh ha ka kyrdan ïakhun kaba 72 kg jong ka dewbah Asia. U dei u coach uba la shemphang bha ha baroh ar jait ki jingïakhun Wrestling; ka Greco-Roman bad ka Freestyle wrestling. Mynta u long u High Performance Wrestling Coach ka Sportality.
Katba u Takeshi Kuboya udei u High Performance Coach jong ka jingïalehkai Judo. Mynta u ïalam ïa ka Prokram Pynroi ïa ka jingïalehkai Judo ha Lbaraki, Japan, kaba pynleit jingmut ha kaba tei ïa ka lawei kaba jrong ha ka liang ka jingtbit ha ka jingstad bad ka jingroi jong ki khynnah ïalehkai.
Haba ai jingkren sha ki lad pathai khubor, u Director ka Sportality u Vikram Malik, u la pynsngew ba ka jingthmu ba la wanrah ïa kine ki Coach na Japan ka long khnang ba baroh ki nongïalehkai kin ïohpdiang ïa kajuh ka kyrdan jong ka jingtbit bad ban kyntiew ïa ka jingïalehkai jong ki sha ka kyrdan kaba shalor.
U la pynpaw ruh ba kane “kam dei tang ka jingthmu na ka bynta ka National Games hynrei ka thong sha ki jingïalehkai Olympic jong u snem 2032 bad 2036”, da kaba kdew ba ‘ha Japan u khynnah u sdang ban ïalehkai ha ka rta ba 5 snem, bad da ka kajuh ka lynti kane ka dei kaba ngi thmu ban leh ha Meghalaya bad na ki nongïalehkai kane ka jylla.
Na ka liang jong u Shingo Harada u la ong, “Khublei shibun ba phi la khot ïa Nga ban long u Coach ha ka Wrestling. Nga la long u nongïalehkai Judo ha Japan na bynta 11 tylli ki snem bad ha ka Wrestling na bynta 9 tylli ki snem. Nga sngewkmen eh ban ïoh ïa kane ka lad, ki khynnah kiba ïa shim bynta ha ka prokram kilanmet ki long kiba sngewtynnat bad kiba shimkhia bha. Ngan leh ïa kaba bha tam ban pyntbit ïa ki khnang ba kin lah ban kiew shaprang katba ngi dang ïaid shakhmat.
U Takeshi Kuboya, u coach ha ka jingïalehkai Judo, u la pynpaw ba ki nongïalehkai Judo ha India ki long kiba kham khlaiñ ka bor met, bad lada ki ïoh ïa ki jinghikai kiba biang ban pyndonkam ïa ki buit ki lah ban khur shibun ki takma.
