Shillong, Nailar 07: Ka Sorkar jylla ka la pynbna ban wanrah ka jingkylla kaba kongsan ha kaba ïadei bad ki eksam Meghalaya Civil Service (MCS). Ha kaba ïadei bad kane na ka liang jong u Myntri Rangbah ka jylla u Conrad K. Sangma u la ïathuh ba ka sorkar ka la shim ka rai ban pynsangeh noh ïa ka optional subject ha ki jingïakhun eksam MCS bad ban wanrah noh da ki subject kiba thymmai ha Meghalaya.
Kumba long mynta ki la don kumba 23 tylli ki optional subject.
“Kaei kaba jia ka long ba ki optional subject ka don ka por ba ka kyrdan ne ka level playing field kam don naba la shaniah beit ha kito ki 23 tylli ki subject kiba dei kiba lah ban jied bad ki don ruh ki optional subject kiba suk ban ïanujor bad kiwei pat bad ki don ruh ki lad haba lah ban shim na kane ka kam. Kan long ka kam kaba khraw ïa ka MPSC ban pynlong ïa kine ki optional exam bad dei halor kine ki jingmynjur ba la shim da ka MPSC bad ka MPSC Reform Committee, kane ka jingai jingmut ngi la ïakren ha ka jingïalang jong ka kynhun Myntri bad la pdiang ïa kane ka jingai jingmut ba kane ka optional subject paper kaba don ha MCS competitive exam la wengnoh,” ong u Sangma sha ki lad pathai khubor ha ka sngi Palei.
Katkum ka jingïathuh jong u Myntri Rangbah u la ong ba kane ka rai ban wanrah ïa kane ka subject ha Meghalaya ka don ka jingthmu ba ki ophisar kin ïoh ki jingtip bad jingsngewthuh ha kaba ïadei bad kane ka kam, kaba ïadei ruh bad ka history, bad ka kolshor. Ha kaba kane kan ïarap ïa ki ban shakri ïa ka jylla baroh kawei.
“Namar kata ngi la rai ban wengnoh ïa ka optional subject,” u la bynrap.
Na ka liang jong u Myntri Rangbah u la pyntip ruh ba kan don ka committee ne ka kynhun ki ophisar ki ban khmih ïa kane ka kam ban shim ha kaba ïadei bad ki subject bad kum kiei ki bynta kiba lah ban buh.
“Kane kadei ka rai kaba kongsan bad kadei ruh ka jingwanrah ka jingkylla kaba kongsan bha ha kaba kane kan ïarap ruh ban pynlong ïa ki eksam MCS kiba sted bad kan ïarap ruh ïa ki kyrtong kiba aplai na ka bynta kane ka kam,” bynrap u Myntri Rangbah.
