Nongpoh, Lber 30: Uwei u samla na ka Shnong Umngei ha Ri Bhoi District u la wan rah ïa ka nam bad ka burom ïa ka jylla, kaba dei hadien ba u la lah ban khur ïa ka jingjop ha ka kyrdan kaba ba ar na ka National Open Kyokushan Karate Championship kaba la dep ban long dang shen ha Nongbah Kolkata.
Une u samla la tip kyrteng kum u Francis Makri,uba don 19 snem ka rta u dei na ka Shnong Umngei bad u la leit ban mih khmat ïa ka Meghalaya Kyokushin Karate Association bad kaei kaba u la wan rah ïa ka nam bad ka burom ka dei kaba ha ka sien kaba nyngkong u la ioh rah ïa ka nam jop ha ka kyrdan kaba ar ha katei ka National Open Kyokushin Karate Championship kaba la long ha Nongbah Kolkata.
Hadien ba ba u la wan phai hynnin ka sngi na Kolkata, na ka liang ka HYC Umden Circle ha ka jingïalam u Samla Dobok Maiong kum u Vice President bad la don ryngkat ruh u President ka Meghalaya Kyokushin Karate Association, u Bah Berin Klein ki la leit ban pdiang burom ïa u ha Guwhati bad kumjuh ruh ha Nongpoh kum ka jingsngewsarong halor ka burom ba la wan rah da une u samla.
Haba kren ha kane ka sngi ba la pdiang burom ïa u samla Francis Makri kum u rang ïakura ne u rangïakhun ïa katei ka jingïalehkai Karate bad uba la wan rah ruh ïa ka nam jop, u Vice President ka HYC, Umden Circle, u la ong ba ka seng ka sngewkmen ban mih kum kine ki khun samla kiba im sngi ha ki kam ïalehkai sport bad lada ki samla hi ki pynleit jingmut ïa ki kam ïalehkai sport kin klet ruh ïa kiwei kiwei ki kam sniew ba bun ki khun samla ha kine ki snig ba mynta ki im ha kam dih kam bam kaba ktah pynban ïa ka jingim bad kumjuh ruh wat ïa ka ing ka sem bad ka imlang ka sahlang.
U la ong ruh ka seng ha kawei ka bynta ka phai khmat ruh sha ka sorkar b akum ka sorkar ka dei ban don ki mat treikam kiba tbit kumno ban kyntiew ïa ki khun samla kiba don sap ha ki kam ïalehkai sport, namar ka jingïalehkai sport ha kine ki sngi kampher la ka dei ha kano kano ka jingïalehkai ka la dei ka lad ai kam ai jam ïa ki khun samla kiba don sap katkum ba la ai sap kyrpang da u Blei.
Na ka lïang u Bah Berin Klein kum u Presiedent ka Meghalaya Kyokushin Karate Association, haba kren ha kane ka sngi u pynpaw ka jingkmen ha kawei ka bynta ba une u samla u la wan rah nam bad wan rah burom bad ha kawei pat ka bynta u pynpaw ka jingsngewkhia ba bunsien wat la ki samla ki don ïa kata ka sap ha ki kam ïalehkai sport bad khlem ka jingkyrshan hi na ka liang ka sorkar kin nym lah ban poi sha ka thong ha kaba bun hi na ki samla ki dei kiba wan na ki longing longsem baduk ba kyrduh.
Namar kata, kum u nongïalam katei ka seng kaba ju kyntiew ïa ki sap ki phong ki khun samla ka phai khmat sha ka sorkar jylla lyngba ka sport department ba kin pyrkhat ne thaw lad thaw lyntri ruh lyngba ki lad jingïarap na ka sorkar ïa kum kine ki samla ba wan rah ïa ka nam bad ka burom bad la jin ba ka don ka jingïarap na ka sorkar bun ki khun samla kin ioh mynsiem bad ki lah ruh ban pynleit jingmut ha katei ka sap kaba ki don, u la bynrap.
