Shillong, Rymphang 06: Kumba 340 ngut ki khynnah shynrang ki la wan ïashim bynta sha ka jingpyrshang jied (trial) ba nyngkong eh jong ka Meghalaya Football Association (MFA) hynne ka sngi Thohdieng (06 tarik Rymphang).
Kane ka prokram pyrshang jong ka MFA ka thmu ban pynrung ïa ki sap ïalehkai phutbol kiba don jingkyrmen ha ka shlem ba thymmai jong ka synjuk bad ka plie na ka bynta ki shynrang kiba la kha hapdeng u snem 2013 bad 2016.
Ha kane ka sngi ki khynnah ki la ïaid lyngba ki jingpyrshang bapher bapher ba la khmih bñiah da ki dkhot ba rangbah jong ka MFA bad ki coach kiba la shemphang bha ïa kane ka jingïalehkai. Nangta la jied ïa ki hynñiewphew (70) ngut ki khynnah shynrang ha ka thup ba lyngkot (shortlist) ki ban hap ïaid lyngba ka bynta kaba bud jong kane ka prokram pyrshang.
Ka MFA ka la pynbna ha u bnai ba la dep ba ka thmu ban sdang ïa la ka jong ka shlem ai jinghikai ha Shillong kum shi bynta jong ka jingbteng ban pynkhlaiñ ïa ka jingpynroi ïa ka phutbol naduh tynrai ha ka jylla.
Ka MFA Academy kan pynleit jingmut ha ka “jingpyntbit ba la buh ryntih, ka jingpynroi kaba neh slem na ka bynta ki nongïalehkai bad ban thaw ïa ka lynti kaba khlaiñ na ka bynta ki samla ïalehkai phutbol ha Meghalaya ban kiew lyngba ka phutbol hapoh ka jylla bad ka ri”, la ong ka synjuk ha ka kyrwoh ha katei ka por.
ïa kane ka jingpyrshang jied (Selection Trial) la pynlong ha madan Third Ground – MFA Turf, kaba ha Polo, bad la sdang ïa ka naduh ka por 9 baje mynstep.
Lah ban kdew hangne ba watla ki don katto katne ki shlem ai jinghikai kiba la don lypa ha Meghalaya kiba la pynïaid da ki klob bad kiwei kiwei ki kynhun, ka jingsdang ïa ka MFA Academy kaba kyrpang kan kham pynkhlaiñ ïa ka jingpyrshang ban kyntiew ïa ki nongïalehkai phutbol na ka bynta ka kynhun jong ka jylla naduh ki kyrdan ïalehkai ba dang khynnah haduh ki kyrdan ïalehkai kiba la rangbah namar ka Meghalaya ka thmu ban pynïar ïa ka phutbol jong ka ha ka ri India.
