Wanpoi ki Saïantis na nongbah Delhi sha Nongstoiñ ban ai jinghikai ïa ki nongrep
Bun kim ju ñiew ïa ka kam rep kum ka kam im ja, ong u bah Macmillan Byrsat
Nongstoiñ, Jylliew 13: Ka College of Agriculture, CAU (I), Kyrdemkulai, Meghalaya bad ka Nongstoiñ College ryngkat ka jingïatreilang bad ka NECTAR Shillong, IRRI Philippines, NABARD Shillong, ICAR IIVR Varanasi, ICAR CICR Nagpur and IUOA Shillong Meghalaya, mynta ka sngi ki la pynlong ïa ka jingïalang na ka bynta ki nongrep ha Nongstoiñ College ïa kaba la tip ruh kum ka “Farmer Innovation Expo-2022, Integrated Agriculture for Rural Bio- Entrepreneurship and Livelihood Security”.
Ha kane ka jingïalang, u bah Macmillan Byrsat MLA ka Nongstoiñ Konstitwensi u la long kum u kongsan, ha ryngkat ka jingïadonlang ki saïantis kiba kynthup ïa u Prof. Dinabandhu Sahoo, Director,Centre for Himalayan Studies, University of Delhi, New Delhi, u Dr. M.S. Behera Pricipal Scientist, ICAR-Central Research Institute on Jute and Allied Fibres, Barrackpore West Bengal, u Dr. U.K Behera Dean CoA Kyrdemkulai CAU Meghalaya and Chairman FIE 2022, ka Dr I. Mawthoh Principal Nongstoiñ College bad kiwei kiwei.
Katei ka jingïalang ka dei ruh shibynta kum ka dak ban plie ïa ka jinghikai kyrpang ïa ki nongrep jong ka thaiñ, ha kaba da ki spah ngut ki nongrep ki la wan ban ïashim bynta ha kane ka sngi ka jingïalang ba la pynlong ha Nongstoiñ College bad kan neh ruh naduh ka 13 tarik u Jylliew 2022 haduh ka 15 tarik mynta u bnai.
Ha kane ka sngi ki kynrem ki lyndang ki la ïoh ruh ban sam ïa ki tiar ki tar kiba bun jaid sha baroh nongrep, kiba la wan ban ïashimbynta lang ha katei ka jingïalang, kynthup ïa ki tiar ban trei ha pynthor, ki khiew ki khra, ki symbai khaw, ki symbai jhur, ki syiar khun bad kiwei kiwei ki tiar pyndonkam ki nongrep. Kum ka dak ban sah jingkynmaw ïa katei ka jingïalang, u kongsan u la ïoh ruh ban pyllait paidbah ïa ka “Kot sah jingkynmaw” ïa kaba la tip kum ka Farmer Innovation Expo-2022.
U kongsan haba ai jingkren ha u la ong “Bun na ki nongrep kim ju ñiew ïa ka kam kaba ki trei kum kawei na ki kam. Hynrei ha ka jingshisha pat ki nongrep ki trei ïa ka kam kum kawei kaba pynlong kum ka ïoh ka kot ïa ka ïing ka sem, ka shnong ka thaw, ïa ka jylla kumjuh ruh ïa ka Ri hi baroh kawei. Kumta wat ju mlien shuh ban ong ngam trei ei ei haba phi trei ïa ki kam kiba radbah, kaba pynmyntoi ym tang ïa phi hynrei na ka bynta ka ri hi baroh kawei”.