Wanpoi ki khusnam jong ka Durand Cup ha nongbah Shillong

Shillong, Naitung 09: Ka mynsiem shongshit ïa ka jingïalehkai phutbol kan sa wanphai biang ha nongbah Shillong ha kaba la pyni paidbah ïa ki lai tylli ki khusnam jong ka IndianOil Durand Cup kaba 134 ha ka jingïalang kaba la pynlong ha State Convention Centre, Shillong.
Katba ka Meghalaya ka pynkhreh ban ïasoh biang kum kawei naki jylla nongpdiang ban pynlong ïa ki jingïalehkai, na ka bynta kawei na ki lympung phutbol ba la rim tam ha ka pyrthei, ka jingïaid ban pyni paidbah ïa baroh lai tylli ki trophy ka pyni ym tang ïa ka jingrakhe jong ka jingsdang, hynrei ka pynskhem biang ïa ka jingangnud jong ka Jylla ban kylla long ka jaka pdeng kaba sei ïa ki nongïalehkai ba kynsai jong ka ri India.
ïa kine ki khusnam yn pynïaid kylleng ka nongbah Shillong, Nongstoin bad Tura, kaba ailad ïa ki paidbah ban ïohi kham jan ïa ki khusnam ba rim tam jong ka dewbah Asia shuwa ban sdang kane ka lympung.
Ka jingpynïaid kylleng ïa kine ki khusnam ka la sdang na State Convention Centre ïa kaba la pynbna paidbah da u Myntri Rangbah ka Jylla Meghalaya, u Conrad K Sangma; ha ka jingïadonlang u Myntri ka tnad ïalehkai- u Bah Shakliar Warjri; u Air Marshal Suraj Singh, Air Officer Commanding-in-Chief, Eastern Air Command, Lieutenant General Sanjay Malik, SM GOC 101 Area; u Lieutenant General Mohit Malhotra, AVSM, u Chairman jong ka SM COS HQ Eastern Command DCOC; bad katto katne ki ophisar shipai ba rangbah, ki heh sorkar, bad kiwei kiwei.
Haba pynpaw ïa ka jingsngew sarong ban ïoh pynlong ïa kawei pat ka samoi jong ka kawei na ki lympung kaba rim tam ha ka pyrthei kata ka Durand Cup kaba 134, u Conrad K. Sangma, Myntri Rangbah ka Jylla, u la ong, “Nga shim ïa kane ka kabu ban ai khublei ïa ka Indian Armed Forces kaba la jied ïa ka Shillong kum kawei naki jaka ban pynlong ïa ka Durand,” da kaba bynrap ba kin don phra tylli ki jingïalehkai ban long ha J.N. Sports Complex, Polo, Shillong.
“Ngi la ïoh mad ïa samoi kaba seisoh bha ha u snem ba la dep, ha kaba Nga lah ban ong da ka jingsngew sarong ba ka Shillong ka dei kawei na ki nongpdiang kaba biang tam, ha kaba ïadei bad ka jingsngew, ki jingpynbeit, bad ka jingtuid jong ki nongkyrshan. Nga lah ban pynthikna ïa phi ba mynta u snem ruh kan long kumjuh. Ngi kham bun ki kynhun trai ri kiba ïashim bynta ha kane ka kynti, kaba pynsngewtynnad shuh shuh ïa ki nongkyrshan jong ka nongbah Shillong bad ki paidbah ka Meghalaya”.
Shuh shuh u Myntri Rangbah u la ban ba ka rukom kyrshan jong ka Sorkar ïa ki jingïalehkai ha kine ki hynñiew snem ba la dep, ka la pher bak-ly-bak na kaei kaba la jia shwa kata. Ha kine ki 7 snem ba la dep haduh 70% la lah ban tei ïa ki jaka ïalehkai ha ka jylla, bad haduh kumba T.2000 klur la bei tyngka ha ki projek ïalehkai bapher bapher.
U la ïathuh ruh ba ka Sorkar ka dang ïaid shakhmat ban shna ïa ka Mawkhanu Sports Complex, ka ban long ka madan ïalehkai phutbol ba heh tam ha ka ri. U ïathuh ïa bun tylli ki kam pynroi ban tei ïa ki jaka ïalehkai ha ka Jylla, kynthup ïa ka jingpynbha ïa ka J.N. Sports Complex, Mawdiangdiang Sports Complex, P. A. Sangma Sports Complex ha Tura, Integrated Hospitality & Sports Complex, Shillong, Wahiajer Sports Complex ha Jowai, P. A. Togan Athletic Stadium ha Tura, nalor kiwei kiwei. U la pynpaw ba ïa ka synthetic track na ka bynta ki kam ïalehkai athletic yn shna ha man la ki jaka treikam jong ki district jong ka jylla Meghalaya.
Lyngba kane ka jingbei tyngka kaba khraw bad kaba kongsan u Myntri Rangbah u la pynskhem biang ïa ka jingthmu jong ka Sorkar ban pynthikna ba ka Shillong kan long ka nongbah ka phutbol jong ka ri India ka ban wan.
U Myntri ka tnad ïalehkai u Bah Shakliar Warjri, haba ai jingkren ula pynksan ïa ka jingieid jong ka jylla ïa ka phutbol, da kaba kdew ïa ka jingshongshit kaba khraw ha ka samoi ba la dep jong ka Durand Cup. U la pynpaw ba ka Sorkar Meghalaya ka la kut jingmut ban pynbiang ïa ki lad ki lynti kiba biang na ka bynta ban kyntiew ïa ka kam ïalehkai. U la pynskhem biang ïa ka jingkular jong ka Sorkar ban pynroi ïa ki jingtei ïa ki jaka ïalehkai da kaba pynpaw ïa ka jingthmu jong ka ban tei ïa kawei na ki madan ïalehkai phutbol kaba heh tam ha Asia, ha Mawkhanu, kaba lah ban pdiang ïa ki 40,000 ngut ki nongpeitkai. U la pynpaw ba ka jingthmu ba kongsan jong ka Sorkar ka long ban pynmih ïa ki nongïalehkai Olympic na ka Jylla Meghalaya.
Kumjuh na ka liang jong u Lieutenant General Sanjay Malik, SM GOC 101 Area u la ong, “Ka long ka burom ban ïeng ha khmat jong phi mynta ka sngi katba Ngi dang pynkhreh ban wanrah ha khmat jong phi ïa kawei na ki lympung phutbol kaba rim tam- ka Durand Cup, sha ka nongbah Shillong. Ngi sngewnguh eh ïa ka Sorkar Jylla Meghalaya na ka bynta ka jingkyrshan ba khlem sangeh jong ki, na ka bynta ka jingpynkhreh ïa ka jaka, bad ban pynthikna ïa ka jingkyrshan ha ka liang ka jingbit jingbiang bad ka rukom pynïaid.”
U la ong ba ka jingthmu jong ka Sorkar Jylla ban rah kylleng ïa kine ki lai tylli ki khusnam ba pawnam, kan ai mynsiem ïa ki samla ban shimkhia ïa ka Football.
Ha kane ka jingïalang la pynsngew ruh ïa ka jingrwai jong ka Meghalaya Durand Cup: kaba la ai kyrteng “Here we go”.
Hadien ka jingseisoh bad ka jinglah ban khring ïa u nongpeitkai uba bun ka nongbah Shillong, kaba dei kawei na ki jaka ban pdiang ïa ki jingïalehkai Group Stage jong ka lympung Durand Cup 2025, sa shi sien pat kan ïoh ban pynlong ïa ka wat ïakhun quarterfinal bad kumjuh ruh ïa ka semifinal mynta u snem. ïa kane la pynthikna da ka Sorkar Jylla hynne ka sngi Balang.
La pynbna ruh ba ka kynhun shipai jong ka ri Malaysia kan long ka kynhun kaba saw ha ka Group E, kiba kynthup ïa ka Shillong Lajong, ka Rangdajied United bad ka NorthEast United kaba ïada ïa ka burom lahduh.
Ïa ki lai tylli ki khusnam jong ka lympung ïalehkai Durand Cup la plie paidbah hynne ka sngi Balang (09 tarik Naitung) ha nongbah Shillong ha ka jingïadon lang ki Heh Ophisar jong ka tnad Shipai, u Myntri Rangbah ka Jylla, Myntri ka tnad Sports, u Director ka tnad Sports bad u President ka Meghalaya Football Association.
La ïathuh ba ka kynhun shipai na Indonesia kan ïashim bynta hynrei kumba ka paw ka la weng noh bad ka kynhun shipai na Malaysia kan shim ïa ka jaka jong ki.
Ki jingïalehkai na ka bynta ka Group E yn pynlong ha JN Stadium hangne ha nongbah Shillong, ka ban sdang naduh ka 26 tarik Naitung.
Hadien ka jingïalehkai kaba itynnat ha u snem 2024, ka Lajong ka la shah pynkhyllem noh ha ka semifinal ha ka NEUFC, ha kaba kane ka klob Indian Super League ka la ïaid shakhmat ban jop syndon ïa ka nam lahduh pyrshah ïa ka Mohun Bagan ha Kolkata.
Ka Durand Cup mynta u snem, kaba la buh ban sdang naduh ka 23 tarik Naitung haduh ka 23 tarik Nailar 2025, kan long ha ki phra tylli ki jylla- West Bengal, Jharkhand, Assam, Manipur, bad Meghalaya.