Wanphai ka Malki SC da ka nam jop, da 2 kol pynliem ïa ka Mawkhar SC

Shillong, Jylliew 24 : Ka Malki SC ka la wanphai da ka nam jop ha ka OC Blue Shillong Premier League 2021-22 da kaba pynliem da 2-0 pyrshah ïa ka Mawkhar SC ha ka jingïalehkai ha ka sngi Thohdieng ha madan Third Ground, Polo, Shillong.
Ka Malki SC ha ka jingïakhun ba nyngkong ka la rem da 0-3 kol ha ka Ryntih SC katba ka Mawkhar SC ka la ïakhaid da 1-1 kol bad ka Rangdajied FC.
Kine ki ar tylli ki club mynta ka samoi ki don ïa ki katto katne ki player kiba la ïoh jinghikai bha na kane ka lympung bad ki la sei madan ruh ïa ki ha katei ka jingïalehkai.
Haba phai sha ka jingïalehkai, ka Mawkhar ka la ïoh ban thep nyngkong lyngba u Aibanraplang Dohling hynrei ym shym la kheiñ kol na ka daw ka offside. Hadien ar minit ba la ïaid biang ka jingïalehkai, u kapten ka Malki u Pynkhambor Suting u la ïoh ban khyrwit ïa ka bol kaba la lait salit ban rung shapoh ka jar, shwa ba u Balajied Syiemlieh ka Mawkhar ruh u la khyrwit kaba la lait noh sharud ka madan.
Ka Mawkhar ha ka minit ba 29 ka la ïoh ïa ka indirect free-kick hadien ba u rangap kol ka Malki u Rihoklang Khongjoh u la bat slem ïa ka bol, hynrei ka Mawkhar ka khlem lah ban thep kol.
Ka jingïalehkai ka la nang ïakhaid hapdeng kine ki ar tylli ki club kiba la trei shitom da ka thong ban thep kol bad shwa ban kut ka kylla step kata ha ka minit ba 45 u Donboklang Mawlong u la ïoh ban thep ïa ka shi kol na bynta ka Malki ban lamkhmat ïa ka jingïalehkai ha kaba kut jong ka kylla step da 1-0.
Ha ka jingïalehkai jong ka kylla miet, ka Malki ka la nang pynkhlaiñ ïa ka kynhun bad ñion beit sha ka kut jong ka Mawkhar ban pynsmiej ruh ïa u rangap kol ka Mawkhar lyngba ki bol ba ka la ïoh ban khyrwit.
Bad lyngba katei ka rukom ïalehkai kam shym la shimpor ha kaba ha ka minit ba 48 u Kordor Dkhar u la thep ïa ka shi kol kaba la nang ai mynsiem ïa ka kynhun kaba la tam da 2-0.
Ka Mawkhar, kaba ïalehkai nyngkong eh ha ka OC Blue SPL, ka la ïakhun tyngeh ban pynphai ïa kitei ki ar kol hynrei ka khlem lah pat ha ka liang ban pyndep thep kol. Ha ka minit ba 53 ka Mawkhar kaba la ñion sha ka kut jong ka Malki ka la jan ïohei shi kol hadien ba u rangïalehkai u la khyrwit ïa ka bol kaba la tam khydiat ïa u dieng kol.
Watla hapdeng ka jingïakhun kaba ïakhaid bha, ka Mawkhar ka khlem lah ban pynphai kol bad ka Malki SC ruh ka khlem ïoh shuh ban thep kol bad jop da 2-0.
Ka jingïalehkai mynta ka sngi Saitjaiñ kan long hapdeng ka Ryntih SC pyrshah ïa ka Rangdajied United ha ka por 4 baje janmiet.