Wanphai ka Langsning da ka nam jop, kiew kyrdan ba lai ha ka SPL

Shillong, Naitung 07 : Ka Langsning FC ka la wanphai da ka nam jop ha ka lympung ïalehkai OC Blue Shillong Premier League (SPL) 2021-22 da kaba pynliem da 2-1 kol pyrshah ïa ka Rangdajied FC ha ka jingïalehkai ha ka sngi Palei ha madan Third Ground, Polo, Shillong. Bad lyngba kane ka nam jop ka Langsning FC ka la kiew sha ka kyrdan ba lai na ka miej kheiñ point.
Ha kane ka sngi shwa ban ïalehkai, ka Rangdajied ka kamai 5 point da kaba jop shisien bad ïakhaid arsien katba ka Langsning ha kamai 4 point. Ka Rangdajied ha ka samoi ïalehkai 2019 jong ka OC Blue SPL ka khlem mad shisien ruh ka nam rem (jop san sien bad ïakhaid hynñiew sien) bad khatduh ka la rem ha katei ka league ha ka jingïalehkai ha ka 24 tarik Risaw 2018 ha ka Shillong Lajong FC.
Haba phai pat sha ka jingïakhun ha ka sngi Palei, ka RUFC ka la jan lamkhmat nyngkong ha ka jingïalehkai ba la ïaid 18 minit hynrei ka bol ba la pynrung da u Donboklang uba la sangah da ka khlieh ym shym la kheiñ kol namar u ïeng ha ka liang ka offside. Shwa kane ruh, u Knerktilang Buam u la khyrwit ïa ka bol kaba itynnad bha hynrei u rangap kol ka Langsning u Surjay Kumar Pariyar u la ïoh ban kyrda noh.
Ka Rangdajied ka la pyrshang ban pashat bol najan hajan ha ka kut jong ka, da kaba pashat bol napdeng hadien bad sha u rangap kol. Hynrei katei ka rukom ïalehkai kam shym la pynneh slem ha kaba ka don ka jingbakla ha ka bynta ba shadien kaba la pynlong ba kan shah thep kol.
U Pale da kaba suk u la ïoh ban knieh ïa ka bol na ka jingbakla u Maxderidoff Wahlang hapoh box bad pyrshang ban pyllait arsien da ka kjat kadiang jong u. Hynrei u Pale u la ïoh ban pyndei tiak bad ïoh ïa ka kabu ban thep ïa ka shi kol na bynta ka Langsning ha ka minit ba 22. Ka Langsning ka la lah ban kyrda bad ïakhun tyngeh haduh kaba kut jong ka kylla step bad ka la lamkhmat da 1-0.
Hadien la wanphai na ka jingshong jahthait, ka Rangdajied ka la sdang sa da kawei pat ka rukom ïalehkai da kaba sdang ban pashat bol na shajngi bad ka la ïoh bun ki kabu ban thep kol. Ka jingkum pynur bakla da u Ronney W Kharbudon u rangïalehkai ka Langsning ha syndon jong ka box u Donboklang u la wan ban shut ïa ka freekick hynrei u Pariyar u la ïoh ban pyndei ïa ka bol da ka kti.
Ka Rangdajied ka la nang ïakhun tyngeh bad ñion sha ka kut jong ka Langsning bad dei ha ka through bol u Chesterpaul Lyngdoh u la ïoh ban khyrwit hynrei sa shisien u Pariyar u la ïoh ban pyndei ïa ka bol kaba la poi sha ki kjat u Donboklang u ba la khyrwit tyngeh ïa ka bol kaba la rung beit jlang shapoh kol ban pynïakhaid na bynta ka Rangdajied.
Da ka jingïathep ba mar shi kol ka jingïakhun ka la nang ïakhaid ha kaba baroh arliang ki la ïoh ki kabu kiba biang ban thep kol. U Tariang u la ïoh ban khyrwit ïa ka bol kaba la leit dei noh ïa u dieng kol bad phai pat sha madan ïa kaba la ïoh da u Kynsaibor Lhuid hynrei u rangap kol ka RUFC u Banshanlang Sten u la ïoh ban kyrda noh.
Ka Langsning kaba la ñion shakhmat ka la ïoh ban pynsmiej katto katne ki jingpyrshang thep kol bad da ka jingïai ïakhun ha ka minit ba 71 u Shano Tariang u la thep ïa ka kol pyntam na bynta ka Langsning FC kaba la lah ban bat skhem haduh kaba kut bad khur syndon ïa ka nam jop.
Lyngba kane ka jingjop, ka Langsning mynta ka kamai 7 point, bad don shadien ka Ryntih kaba bat kyrdan ba nyngkong bad ka Mawlai ba ar. Katba ka Rangdajied kaba mad ka nam rem ka la hiar sha ka kyrdan ba san da kaba ïaryngkat point bad ka Nangkiew Irat da kaba kamai mar 5 point.
Ka jingïalehkai kan long biang ha ka sngi Saitjaiñ hapdeng ka Mawlai SC pyrshah ïa ka Malki SC ha ka por 4 baje janmiet.