Nongstoiñ, Nailur 15: Ka Khasi Students Union West Khasi Hills District, ha ka sngi nyngkong ka la leit ujor sha u Deputy Commissioner ka District, ban pyrshah jur ïa ka jingwan kyntur pud jong ka Sorkar Assam sha ki shnong Khasi kiba hap hapoh ka West Khasi Hills District.
Ka KSU ba la ïalam da u President samla Johnfisher Nongsiang bad General Secretary samla Franklin Syiemiong, ki la leit ai da ka shithi ujor sha u Deputy Commissioner ka District.
Katkum ka shithi, ka KSU ka la pyntip ba ha ka 11 tarik Nailur, ka Sorkar Assam ka la wan skud jaka ban shna ïa ka surok ka ban leit sha ka shnong Sohmaring kaba hap hapoh ka Hima Jyrngam West Khasi Hills. Ïa kane ka surok la pom lynti lyngba ka shnong Nongdronpara, Nongma, Nongmawlein bad Nongsohram.
Ka la pyntip ba kine ki shnong ki dei ki shnong Khasi paka bad ki dei kiba hap hapoh ka West Khasi Hills District.
Ka KSU ka la dawa ïa u Deputy Commissioner ba un tuklar mardor ïa kane ka jingwan kyntur pud, khnang ban lait na kino kino ki jyrwit jyrwat khamtam haba ki ar jylla ki dang don hapdeng ka jingïakren pynbeit pud.
Ha kajuh ka por, ka KSU ka la pynpaw ïa ka jingsngewkhia halor ka jingïai bteng jong ka Sorkar Assam, ban wanrah jubor ïa ki skhim bad ki project bapher bapher ha ki shnong khappud, khlem da burom ïa ki jingïateh kular ne ka status quo, ba ka dei ban don shuwa ka jingïamynjur lang na baroh ar jylla, hashuwa ban pyntreikam ïa ki skhim ne project.
