Wan shim bynta u Temjen Imna Along ban rakhe ïa ka sngikha u Atal Bihari Vajpayee ha Upper Balian

Nongpoh, K’Lyngkot 02: Da ki spah ngut ki paidbah ha ka thain Upper Balian, Byrnihat ha ka taiew ba la dep ki la pdiang burom ïa u Temjen Imna Along, uba dei u Myntri ka tnad jngohkai pyrthei bad u Myntri ka tnad pule puthi ka Jylla Nagaland haba wan ban iuhkjat mynta ka sngi ha Upper Balian ban shim bynta kum u kongsan ban rakhe ïa ka lyngkhun sngikha ba 101 snem u Myntri Rangbah barim ka ri India u Atal Bihari Vajpayee.
Ïa kane ka prokram ka jingrakhe ïa ka lyngkhuh sngi kha u Atal Bihari Vajpayee la pynlong da ka BJP Jirang Mandal ha ka jingïalam u President ka BJP Mandal u Bah Albertus Lapang bad u Bah Himanta Timung, State State Morchah ST President bad kiwei kiwei ki nongïalam ka BJP na Jirang Mandal.
Kiwei kiwei kiba la ïa don lang ha kane ka sngi ki kynthup ïa u Rigman G. Momin, u President ka State BJP, u Himanta Timung, State President BJP (ST), u Bah Sen Thabah, President BJP Ri Bhoi, u Bah Albertus Lapang, President BJP Jirang Mandal, u PS Toor lem, ki riew rangbah lem bad da ki spah ngut ki paidbah ka thain Byrnihat.
Haba kren ha kane ka sngi kum u kongsan, u Temjen Imna Along kumm u Myntri sorkar na Nagaland bad uba dei peit ruh halor kane ka prokram rakhe ïa ka lyngkhuh sngi kha u Atal Bihari Vajapayee, u la pynpaw ba dap da ka jingkmen ban shimbynta ha kane ka sngi ban kyrpang kyrpang ïa kane ka sngi kha jong u Myntri Rangbah barim ka ri na ka party BJP bad kum u Myntri barim ka ri u don ïa ka hok ruh ban ioh jingïaroh halor ki synniang kiba u la shakri ïa ka ri bad uba la long ruh kum uwei na u riew khraw ka ri.
U la ong ruh ba u Atal Bihari Vajpayee, u dei u Myntri rangbah ba nyngkong ka ri na ka party BJP bad ha ka jinglong jong u kum u Myntri rangbah ka ri, u la dep ban leh shibun ki kam pynroi hapoh ka ri bad kyrpang ruh ïa ki jylla shatei lam mihngi ka ri India.
Shuh shuh, u la pynpaw ruh da kaba ong ba ka thong jong ka BJP ka long ban kyntiew ïa ka ri India kum kawei na ka ri kaba kiew shakhmat eh ha ka pyrthei bad na ka liang ka BJP ha ka jingïalam u Myntri rangbah ka ri u Narendra Modi ki la wan rah shibun ki kam pynroi ha ka ri bad ka sorkar BJP ka phai khmat ruh sha ki jylla shatei lam mihngi ka ri India khnang ba ka ri India kan kiew shaphrang ha ki liang baroh kumba ba la buh thong da ka sorkar u snem 2047 ka jingdap 100 snem ba ka ri India ka la ioh ïa ka jinglaitluid.