Nongpoh, Ïaiong 15: Ka ophis u District Sports Officer, Ri-Bhoi District haka jingtreilang bad ka Atheltic Committee jong ka RBDSA mynta ka sngi kila sdang ïaka lympung District Level Inter School Athletic Meet 2025, ba 3 sngi lynter, ha madan NSCA Pahamsyiem.
Ia katei ka lympung ïalehkai sports la wan ban plie pyrda da u Bah Eric Dkhar BDO ka Umling C&RD Block kum u kongsan bad u Bah RB Shadap President ka Ri Bhoi District Sports Association kum u symbud kongsan, haka jingdonlang u Bah Boby L Nongbet, District Sports Officer, Ri Bhoi District ki principal, ki nonghikai bad ki khynnah skul kiba la shimbynta shitrhem ha katei ka sngi.
Kumba 901 ngut ki khynnah kynthei bad shynrang naki 36 tylli ki skul bapher bapher ka Ri-Bhoi District kila wan ban shim bynta ha kane ka lympung, ki ban sa aireng haki jinglehkai bapher bapher ha kine ki 3 sngi lynter.
Haba kren ha katei ka sngi naka liang u Bah Eric Dkhar u la ong ba ka jinglehkai ka dei kawei naki bynta ban pynheh pynsan ïaka met bad ka jingmut jingpyrkhat jong uwei pa uwei u khynnah, khamtam ka pynlong ïa u khynnah ban trei shitom, ban don ka akor ka burom bad khamtam ka jingtreilang ban poi sha ka thong ka jingjop.
U la ong ruh ba ka pule ka puthi ka dei kaba donkam eh ha kane ka juk ba mynta, hynrei ka jingkoit jingkhiah bad ka kilan met ka ïaid ryngkat ryngkat ban pynheh pynsan ïaki khynnah naduh ka bor met haduh ba ka bor jabieng, bad nalor kitei ki jingmyntoi kan long ruh ka rynsan ïaki khynnah kiba don ka sap ïalehkai namar lyngba kane ka lympung yn sa jied ruh ïaki nongshim bynta kiba kynsai sha kiwei pat ki lympung kiba kham heh haka jylla bad shabar jylla.
