Wan sha ka miej jingïakren, kyrpad u Vice Chancellor ka NEHU ïa ki samla pule

Shillong, Naiwieng, 06: U Vice Chancellor jong ka skulbah North Eastern Hill University (NEHU) u Prof PS Shukla ha ka sngi Balang u la kyrpad ïa ki samla pule bad ïa ki nongtrei ba kin pynkut noh ïa ki jingïakhih ba khlem pud sngi.
U la ong ba ka jingdawa ban weng kam ïa u Registrar, ïa u Deputy Registrar (Academics), ym ym lah ban pyntreikam katkum ka jingdawa jong ki kynhun bapher bapher lane katkum ka jingsngewthuh shimet.
Katkum ka jingong jong u, ka Sorkar ka lah ban thaw ïa ka Inquiry Committee ban bishar ïa ka jingdawa na ka bynta ban weng kam ïa ki, lada ka suba ba ka don kano kano ka jingdkoh ha kaba thungkam ïa ki.
U la kular ba ka jingthungkam na ka bynta ki posts jong ki Non-teaching Staff yn sa pynsdang noh shen tang shu plie ïa ka ophis jong u Registrar, namarba la shu khang khyrdep na ka jingïakhih kaba dang ïai bteng haduh mynta.
Baroh ki jingtreikam ha ka skulbah NEHU kaba pawnam ki la sangeh lut hadien ba ka mih ka jingïakhih ha kajuh ka por ba la khot pynlong da ki samla pule bad da ki nongtrei jong kane ka skulbah.
Ki samla pule hapoh ka shatri jong ka North Eastern Hill University Students Union (NEHUSU) ba la kyrshan da ka Khasi Students Union, NEHU Unit ki la pynlong ïa ka jingshah thngan ba khlem pud sngi bad pynbna ruh ban khang dam pura ïa ka skulbah kum ka dak ban pyrshah ïa ka jingbym lah ban weng kam ïa u Registrar, ïa u Deputy Registrar (Academics), ïa u Officer on Special Duty (Director, College Development Council) bad ïa u Guest House In-charge, katba ki nongtrei kiba don hapoh ka shatri jong ka NEHUNSA ki la pynlong ïa ka jingsangeh treikam ba khlem pud sngi mynta la lai sngi kynthih ban pyrshah ïa ka jingpynslem ban pynkiew kyrdan bad ban thungkam ïa ki post bapher bapher naduh ba la pynmih ïa ka Advertisement ha u Naiwieng, 2023.
Ha ka jingïakren bad ki lad pathai khubor u Prof Shukla u la ong, “ïa ka jingdawa ban weng kam ïa u Registrar, ïa u Deputy Registrar (Academics), yn ym lah ban shu pynshong nongrim na ka jingdawa jong ki kynhun ne na ka jingsngew shimet. Kine ki ophisar, kynthup ïa u Registrar bad ïa u Deputy Registrar, la thung lyngba ka jingpynlong ïa ka jingbishar bniah bad ka interbiw. Ki kam jong ki bad ka jingïai bteng ban trei ïa ka kam la teh da ki kyndon, ym da ka rai shimet na kano kano ka bor ba marwei, kynthup ïa u Vice-Chancellor.”
Da kaba pynpaw ba ki Association kum ka NEHUTA, NEHUNSA, bad ka NEHUSU ki ladep thoh sha ka Sorkar kynthup sha ka President jong ka ri India, u Prof. Shukla u la ong, “lada ka Sorkar ka suba ba ka don kano kano ka jingleh bymsuidniew, ka lah ban thaw da ka Inquiry Committee ban bishar ïa kane ka kam. Hynrei kumba ka long mynta, kam shym la don kano kano ka jingpyntip na ka Ministry lane ne ka ophis jong ka President sha ka ophis jong u Vice-Chancellor kaba kdew ba donkam ban leh eiei halor kane.”
“Ka long kaba donkam ban tip ba ka jingpynkut noh ïa ka kam jong u nongtrei sorkar kam lah ban long khlem ki daw kiba biang bad kiba thikna. Lada ki don shisha ki jingsngewkhia ne ki daw na ka bynta kano kano ka jingleh kaba kum kane, ka jingtreikam kan sdang da ka jingtohkit, ym da ka jingweng kam noh mardor,” u la bynrap.
Haba kaba ïadei bad ka kam jong u OSD (Director, College Development Council), u Prof Shukla u la ong, “nga la ïakren bad kiba bun ki Professor ban shimti ïa kane ka kam. Hynrei ym don uwei na ki, kiba mynjur.”
U la kular, “nga dang ïai ap ban thung ïa uno uno u Professor uba kloi ban trei kum u Director of College Development Council bad kum u Guest House Incharge, NEHU kaba mad mynta ïa ka jingduna jong ki nongtrei.”
Halor ka mat ba la kdew da ka NEHUNSA ha kaba ïadei bad ka jingpynslem ban thung ïa ki nongtrei, u Prof Shukla u la ong ba ka Advertisement na ka bynta ban thungkam ïa ki nongtrei ladep ban pynmih bad watla ka National Testing Agency (NTA) ka la kyntait ban pynlong ïa ka written examination, ngi la ïaid shakhmat ban khot tender da kiwei pat ki Agency.
“Bun na ki Agency ki la pynpaw ïa ka mon, bad tang shu plie ïa ka ophis u Registrar’ (ba la khang tala na ka jingïakhih), ïa kine ki File yn sa phah noh mardor. Ynda la pyndep pura ïa ka jingthungkam, yn sa thung ïa u Guest House Incharge bapura,” la kular u Prof. Shukla.
Ha kaba ïadei bad ka jingdawa ban thung Pro-Vice Chancellor ha Shillong bad ha Tura Campus, u Vice Chancellor u la kular ba ka jingthung ïa ki arngut ki Pro-VC na ka bynta ka Shillong bad Tura kan long hapoh u bnai Nohprah, lada kam don kano ka jingai ktien na ka Sorkar ban pynshai halor kane ka kam.
“Nga kwah ban pyntip ïa phi ba ka University ka ladep ban phah da ka jingthoh sha ka Ministry na ka bynta ban pynshai shuh shuh halor kane ka mat bad ngi dang ap ïa ka jubab jong ki. Ngan sa thoh biang sha ka Ministry sa shisien bad lada kam don kano kano ka jingai jubab hapoh u Nohprah 2024, ngan sa thung hi ïa ki arngut ki Pro-Vice-Chancellor na ka bynta ka Shillong bad ka Tura Campuse napdeng ki trai ri trai muluk,” u la ong.
Shuh shuh, u VC ula ong ba un sa khot ïakren noh mardor ïa ki samla pule bad ïa ki nongtrei na ka bynta ban ïathir ïatai bad ban pynurlong ïa ki jingdawa jong ki.
“Sngewbha wan shakhmat ban ïakren halor kane ka kam. Tang ka jingïathir ïatai kaba lah ban weng ïa ki jingeh. Kam don da kawei pat ka lynti. Wan sha ka miej jingïakren ban ïathir ïatai katkum ki kyndon, ki aiñ bad ki rul. La teh ïa nga da ki rul bad ki kyndon. Nga long uba kloi ban ïakren bad ki samla pule jong nga bad kumjuh bad ki nongtrei,” la ong u VC.
Da kaba kyntu ïa ki ban pynkut noh ïa ka jingïakhih, u Prof Shukla u la ong, “ka jingkyrpad jong nga ïa ki samla pule, ïa ki nongtrei bad kumjuh ruh lada ki nonghikai ki don bynta lang, sngewbha ban pynkut noh ïa ki jingïakhih na ka bynta ka bha ka miat jong ki samla pule ka NEHU. Kaei ka ban jia lada ka jingïakhih kan dang ïai bteng? Khlem pep, ka eksamin kan ktah. Mano ban jynjar? Namarkata, wan sha ka miej jingïakren nga long uba kloi ban sngap ïa ki jingeh da ka lynti ka jingïakren.”
Haba kylli, u VC ula ong ba u ladep ban ïakren bad ka NEHUNSA bad shen un sa pynmih ïa ka jingthoh kum ka jubanlak ban pynurlong ïa ka jingdawa jong ki.
Ha kajuh ka por, u VC ula ong ba yn ym hiar shuki wat hapdeng ka jingdawa jong ki kynhun bapher bapher.
“Ngam pat long uba kloi ban hiar shuki. Ïa nga la thung da ka President jong ka ri India. Ngan kohnguh ïa ka rai kaba la shim da ka President ka ri India,” u la ong shuh shuh.
Ha kajuh ka por, ka NEHUNSA ka la pynbna ba ka la shim rai ban pyllait ïa ka Examination Department na ka jingsangeh treikam na ka daw ka jingdon ki eksamin Undergraduate ki ban sa long, naduh ka 11 tarik, Naiwieng.