Wan sakhi u Lat ka jylla haka ka prokram ‘Swasth Nari, Sashakt Parivar Abhiyaan’ ha Ummulong

Jowai, Nailur 29: U Lat ka jylla u C.H. Vijayashankar mynta ka lah sngi U Blei ula wan ban sakhi lang kum u kongsan haka prokram Special Health Camp jong ka “Swasth Nari, Sashakt Parivar Abhiyaan” (SNSPA) bala pynlong ha Ummulong CHC daka District Medical & Health Officer West Jaiñtia Hills District.
La pynsngew da ki nongtrei ka khoit ka khiah jong ka District kane ka prokam ka long shi bynta ban ai jingïarap nyngkong eh ïa kito ki longkmie kiba punkhun haduh ban da kha ïa i khunlung lada dei haki jaka nongkyndong bad ha sor kumjuh. Ha kane ka prokram kila don haduh 994 tylli ki Campaign bad mynta la dep ban pynlong haduh 700 tylli, ha kaba da ki hajar kila ïoh jingmyntoi na kane ka prokram hapoh ka District.
Ha kane ka sngi la donlang da u Myntri ka koit ka khiah jong ka sorkar jylla u ma Wailadmiki Shylla (MLA), u Dr. Joram Beda, IAS, Commissioner & Secretary ka koit ka khiah ka sorkar, ka kong B. Blah (MCS) Additional Deputy Commissioner WJH, ka Dr. N. Kharsahnoh Director of Health Services (MCH&FW) nalor kiwei kiwei de, katba ïa ka jingïalang la pynïaid da ka Dr. P. Shylla, District Medical & Health Officer.
Na ka liang u Lat ka jylla haba ai jingkren ula ai ka jingïaroh ïa kane ka prokram ba 15 sngi bala pynithuh da u Myntri Rangbah duh jong ka Ri u Narendra Modi kaba long kyrpang eh na ka bynta ka koit ka khiah jong ki longkmie kaba la sdang ban ai jingtip bad jingsumar naduh ka 17 tarik u Nailur haduh ka 2 tarik u Risaw 2025.
Lyngba kane ka prokram shibun ki jingmyntoi kiba lah ban ïoh khlem ka jingsiew lada dei ha ka jingpang klongsnam, jingpang cancer, jingpang khyllai ne kino kino ki jait jingpang. Baroh ki rukom Check-up, ki dawai bad ki lad jingsumar na ka bynta ki khynthei yn ai lyngba kane ka prokram, da kaba u kyntu ban shimkhia ïa kane ka kabu bala ai da ka sorkar, ong u Vijayashankar.
Shuh shuh ula pyntip hapoh ka jylla Meghalaya ki don lai tylli ki mat (issue) kiba hakhmat eh ban pynbha ïa ka koit ka khiah kata ka jingpang Cancer, ba ar sa ka jingpang TB, kaba lai u Drug bad ka jingpang HIV. Halor kine ki jait jingpang ula kyntu ba ka tnad ka koit ka khiah ka dei ban trei shitom ba ai jingsumar ïa ki nongpang haka por kaba biang da kaba u kyntu ruh ïa kino kino kiba don ïa kine ki jait jingpang kin wan mih shakhmat khnang ban ïoh ka jingsumar kaba biang.
Ula kyntu ïa ka District WJH ba kan trei shitom ban pynlong ïa kane ka prokram kaba jop namar hadien ka 2 tarik u Risaw ym lum jingtip na baroh ki District hapoh ka jylla, kino napdeng ki lai tylli ki District kiba pyntrei kam bha ïa kane ka Swasth Nari, Sashakt Parivar Abhiyaan (SNSPA) da kaba yn ai khusnam ïa ki ha Raj Bhawan.
U Vijayashankar ula ïaroh ruh ai ka jinglong ba kyrpang ka Dustur jong ka jait bynriew hapoh ka jylla kaba la ai jait sha ka kynthei bad kumjuh ïa ka hok ka kynti baroh, ym kumba long ha kiwei pat ki jylla hapoh ka Ri India. Ha kane ka sngi la sam ruh ïa ki jingai sngewbha sha ki khynnah (Adolescent) bad kumjuh sha ki 5 ngut kiba la heh ka rta.
Ha kane ka prokam la pynlong ruh ïa ki lad jingsumar sha ki nongïoh myntoi lyngba ki check-up bapher bapher bad ka jingmyntoi na ka MHIS da kaba pynrung kyrteng lyngba u Aadhaar Card, la pynphuh shuh shuh ïa kane ka sngi da ki jingshad tynrai na ki nongtrei ka Ummulong CHC. Hadien kane la don ruh ka jingïkynduh lang bad ïaphylliew jingmut hapdeng ki ophisar na ka DC ophis bad ka tnad ka khoit ka khiah.