Nongpoh, Jymmang 05: Kiba bun ki Longkmie bad ki riew rangbah mynta ka sngi ki la mih shakhmat ban wan ban pynïasoh sha ka Congress party ha Umroi Constituency, kaba dei hadien ba u MLA ka Congress dang shen u la pynïasoh ïa lade sha ka Party Trinamul Congress ba bun ki nongkyrshan ka Congress ki la shah iehnoh khunswet.
Kine ki Longmie bad ki riew rangbah ha ka jingdon lang u Bah G.S Shadap, u Bah Josaia Shadap bad u Bah Rangkynsai Rympei ki la wan ban pynïasoh sha ka Congress Party ha ka jingïalang kaba la long mynta ka sngi ha Lumsohpieng Bhoirymbong ba la lum la lang da ki Adhoc Secretary, u Samla Isynei Hinge bad u Samla Apbor Nongrum.
Ïa kine ki longkmie, ki rangbah bad ki samla ba la wan ban pynïasoh sha ka Congress party la pdiang sngewbha da u working President ka MPCC, u Bah P.N Syiem bad ryngkat ka jingdon lang u Vice President ka MPCC, u Bah P. Lyngkhoi, u District President ka Congress bad uba dei u MDC ka Mawhati, u Bah Charles Marngar lem bad kiwei kiwei ki nongïalam ka Congress Party.
Haba kren ha kane ka sngi, u working president ka MPCC, u Bah P.N Syiem u la ai khublei kyrpang ïa kitei ki riew rangbah, ki samla bad ki Longkmie kiba la wan ban pynïasoh sha ka Congress party bad kane ka jingwan pynïasoh jongki sha ka Congress party ka don ka daw ba ba ki sngewieit ïa ka party kaba dei kawei na ka party kaba la wan shibun ki jingkylla hapoh ka jylla.
U la ong ruh dei ka Congress party kaba la wan rah shibun ki jingkylla bad ki matti ba ka Congress ka la wan rah na ka bynta ka jingmyntoi ki paidbah ka dei kawei na ka daw ba ki paidbah ki dang ieit ïa kane ka party ba wat hadien ba bun ki la pyrshang ban kynthoh kylla ïa kane ka party kaba la noh synñiang shibun ki kam pynroi hapoh kane ka jylla.
U la niew tang ruh ïa ki matta ka Congress party kum ha kaba pynioh ïa ka jylla ba pura, ka jingwan rah ïa ka NEHU, ka NEIGRIMS bad ki lynti ki synkien bad lada ym dei na ka Congress party ka jylla jongngi ka dang dei kawei na ka jylla kaba dang sahdien hapoh ka ri.
Namarkata, u la bynrap ruh da kaba ong ba ka party Congress kan nym tieng nym riej ba kan dang bteng ban ai ka jingshakri sha ki paidbah ka jylla bad ha kane ka election ban sa wan ruh ka party kan dang trei shitom bad kum ka party kam pat duh ka jingkyrmen wat la shibun ki la phet na ka party namar ba ki paidbah ka jylla haduh kine ki sngi ki dang phai khmat sha ka party Congress ban dang wan rah ïa ki jingkylla hapoh ka jylla, u la bynrap.
