Wan pynhap pyrda u Myntri Rangbah ïa ka Jubili Ksiar ka Nartiang Presbyterian HS School

Jowai, Nohprah 09: Ka Nartiang Presbyterian Higher Secondary School, Moodop WJHD kaba la rakhe ha baroh shisnem ïaka jingdap sanphew (50) snem ne jubili ksiar (1975–2025) bad mynta ka sngi 9 tarik Nohprah 2025 la wan ban pynkut ïa kane ka jingrakhe da u Myntri Rangbah ka Jylla u Conrad K. Sangma kum u kongsan bad u ma Sniawbhalang Dhar Symbud Myntri Rangbah uba long ruh u MLA ka thaiñ kum u Symbud kongsan.
Ha kane ka sngi shwa ban sdang ïa ka Programe la ïoh ïa ka jingrwai ieit Ri (National Anthem) da ki samla pule jong ka skul, ka jingpule na ka jyngthoh bakhuid (Baibel) da ka Kong I.J.R. Tongper kaba long ka Principal jong ka Skul bad ka jingkren pdiang sngewbha ïa baroh da u Tymmen Basan. H. Khynriam uba long ruh u Chairman jong ka School (SMC). La pule ïa ka Memorandum da u Secretary SMC bad ai ha u kongsan ïa kiba ka skul ka la kdew ïa ki mat jingïarap ba kongsan.
U Myntri Rangbah, u Conrad K. Sangma haba kren ha kane ka sngi, u pynpaw ïa ka jingkmen kaba khraw haba u la ïoh kane ka lad ban wan sha Nartiang ban pynkut ïa kane ka jingrakhe jingdap sanphewsnem (Golden Jubilee) jong ka Nartiang Presbyterian Higher Secondary School wat hapdeng ki jingbun jong ki programe kiba u dei ban don.
Haba kren ha kane ka jingïalang u ai khublei ïa baroh ki nong pynïaid ïa kane ka skul bad ïa baroh kito kiba donkti ha kaba pynkhreh ïa kane ka programe ban pynkut ïa kane ka sngi rakhe jingdap sanphewsnem kane ka skul (Nartiang Presbyterian Higher Secondary School Modop).
U Conrad K. Sangma ula ong ba ha ka jingïaid lynti jong kane ka skul ha kine ki sanphewsnem kala pynmih shibun ki rang bad ki thei pule jong ka shnong Nartiang bad ki shnong kiba marjan kiba wan pule ha kane ka skul. Nangta u ong ka skul bad ka jingnang jingstad ka long kaba donkam ha ka juk mynta ym tang ban nang ka thoh ka pule ka kheiñ ka diah ka hikai ruh ïa ka Akor ka Burom ha ka longbriew manbriew.
Shuh shuh u Conrad K. Sangma, u ong na baroh ki Jylla ka North East kum ka Tripura, Mizoram, Manipur bad Nagaland ka Meghalaya ka dei kaba bun eh ki skul. Ka Meghalaya ka don haduh 14,000 tylli ki Skul bad 25 hajar ngur ki Nonghikai, hynrei pat kumba 206 tylli ki skul kiba duna ki Nonghikai bad kumba 200 tylli pat ki skul kiba ym don khynnah skul. Nangta u ong ha Meghalaya ki don ki skul kiba don haduh 5-6 ngut ki Nonghikai kiba tang 5-6 ngut ki khynnah bad kane ka jinglong jingman ka pynpyrkhat ïa ka sorkar.
Haba kren ïa ka jingdawa jong ki Nonghikai ban pynkiew tulop bad ban siew ïa ka tulop jong ki Nonghikai, u ong ka sorkar kan pyrshang katlah katiai ban siew katba lah ei la kumno kumno ha shwa jong kane ka Khristmas la ban shuh shuh u Myntri Rangbah. Nangta u ong ïa kum ba long mynta kiba bun ki skul ki hikai tang ïa ka Art stream, khlem ka Science bad ka sorkar jong u kan pyrshang katba lah ban pynbun ym tang ïa ka Arts Stream hynrei ïa ka Science ruh de namar ki Samla pule jong ka Jylla ki donkam ïa ka Science Stream ha ki skul jong kiba don hapoh ka jylla.
Haba kren shaphang ka jingeh jong ki Samla pule kiba shu ïasah ïingwai bad hateng teng kim ïoh ïingwai, ka sorkar ka la shimkhia bad la donkam ban shna ïa ki Hostel na ka bynta ban pynsuk ïa ki samla pule ban shong ban sah pynkut u Myntri Rangbah. Ha ka juh ka por kum ka dak ban nangpynïaid ïa kane ka Higher Secondary School, ula pynïoh 20 lakh lyngba ka Chief Minister’s Special Development Fund na ka bynta ban pynheh (extension) ïa ka School building.
Kham hashwa la ïoh ïa ka jingkren kaba sngewtynnat, ka sneng ka kraw bad ka kyntu ka kynpham na u ma Sniawbhalang Dhar Symbud Myntri Rangbah bad uba long ruh u MLA ka thaiñ. Ha kane ka sngi ka skul ka la pynkup burom ruh ïa ki khynnah skul barim (Past pupils) jong kane ka skul kiba bat mynta ha ki kyrdan treikam ki bapher bapher bad ïa ki samla pule kiba pass bha na kane ka skul.
Ïa ka Golden Jubilee Souvenir la pyllait paidbah da u ma Thombor Shiwat, Chief Executive Member (CEM) ka Jaiñtia Hills Autonomous District Council uba long ruh u MDC ka thaiñ.