Wan pyndem u Area Commander ka HNLC hakhmat ki Pulit Mairang, kem sa 2 ngut kiba sylla pynbthei bom ha Umsning

Shillong, Rymphang 27 : Uwei u Area Commander ka seng Hynniewtrep National Liberation Council (HNLC) ula wan ban pyndem ïalade hakhmat ki Pulit ka Mairang, Police Station Eastern West Khasi Hills ha ka sngi Palei.
ïa une u nongïalam ka HNLC la wan synran sha Shillong ban ïakynduh ïa ka Director General of Police (DGP) ka Jylla.
Une u Heh HNLC u kyrteng u Samuel Wahlang Pahsyntiew, na ka shnong Umpohwin, uba la wan pyndem ha Mairang Police Headquarter ha ka 25 tarik Rymphang ha ka jingïadonlang ki bahaïing, ki bor shnong bad ki Heh Pulit, ong ka kyrwoh bala pynlait da u Assistant Inspector General of Police (A) ha ka sngi Thohdieng.
U AIG (A) u pyntitp ba u Samuel u dei uba suba donkti ha ka jingpynbthei bomb ha 9 tarik Lber 2024 hajan Shillong Syndicate Bus Stand-Them Metor bad kiwei kiwei ki jingjia.
Ha ka jingtohkit, ula phla ba ma u ha ryngkat bad ki ehrang ka HNLC na Bangladesh ki la pyrshang ban pynrung dkhot ïa ki samla sha ka seng ha kine ki arsnem bala leit noh.
Halor kane ka jingtip, ki Ophisar ba tohkit ki la register ïa ka CBPS (ER) Case No. 01(02)2026 bad kem ïa arngut ki suba dkhot na Umsning.
Ki Pulit ki ong ba kine ki arngut la suba jur ba ki dei kiba buh ïa u bomb ha ïew Umsning ha ka 12 tarik Risaw 2025, ïa kaba la lap bad pynduh noh ïa ka bor treikam jong u da ki pulit ka Bomb Squad.
“Ki Pulit ki la nang shim ïa ki kam ba donkam ban pyndep kat kum ka aiñ bad ruh ïa ka policy pyndem wait jong ka Sorkar Jylla” ong u AIG haba pyntip ba ka jingtohkit mynta ka dang ïaid shakhmat.