Nongpoh, Nailar 14: U Prof. Suborno Isaac Bari bala tip kum u nonghikai ba khynnah tam haka pyrthei na New York University, USA mynta ka sngi u la leit ban iuhkjat ha skulbah University of Science and Technology Meghalaya (USTM) ban ai jingkren hakhmat ki hajar ngut ki samla pule halor ka phang “The Impact of early STEM education”.
Nalor ki samla pule jong ka skulbah USTM, palat 500 ngut ki khynnah skul na ki skul bapher bapher ki la leit ban sakhi ha kane ka sngi bad ioh sngap ïa ka jingkren jong une u nonghikai ba la jer ruh kum u Einstein ha kane ka juk ba mynta bad na ka liang u Prof Bari un leit biang ban shim bynta ha ka jingrakhe ïa ka sngi laitluid ka ri ha phyllaw jong ka skulbah lashai ka sngi.
Ïa u Prof. Bari la synran lang ruh da u kpa jong u, u Rashidul Bari u ba dei u nonghikai jong ka Brooklyn Tech New York USA, u Pranesh Debnath, State Representative ka North East India Vyomika Space Academy (ISRO Space Tutor) bad ïa u Prof Suborno Isaac Bari la pdiang burom da u M Hoque Chancellor ka USTM ha ka jingdonlang u Prof GD Sharma Vice Chancellor ryngkat ki nonghikai bad ki samla pule.
Haba ai jingkren ha kane ka sngi, u Prof Bari u la batai halor ka jingktah ka jinghikai ïa ki subject Science, Technology, Engineering, bad Mathematics (STEM) sha ki khynnah kiba dang rit ka rta bad u la ioh ruh ban ïakren, ban mir jingmut bad ban jubab shibun ki jingkylli ha kaba ïadei bad ka subject Physics bad Maths ba la kylli da ki samla pule.
U M. Hoque uba dei u Chancellor jong ka USTM u la ong ba kane ka jingwan iuhkjat jong u Prof Bari kan long ka jingai mynsiem ïa kiba bun ki khun samla ha kane ka juk ba mynta khamtam ki samla na ka thaiñ Shatei Lammihngi ba ki minot bad pynleit jingmut ha ki jingpule ban long ki khraw pyrkhat namar dei tang ka jingnang jingstad kaba lah ban thawdur ïa u briew bad ka jingwan jong u Prof Bari kan pynïajan ruh bad ki riew stad ka pyrthei bad ki skulbah ba paw kumba ka skulbah USTM ka don ruh ka jingangnud ban long kum kawei ka skulbah ba paw ha ka pyrthei shuwa u snem 2030.
