Nongpoh, Risaw 22: Kumba ju long man u snem ki sim kbeit bala tip kum ki Amur Falcon da ki lakh tylli kila wan poi haka shnong Umru bad Tyrso ha Ri-Bhoi District kaba dei ruh ka aiom kaba kitei ki jait sim ki wan ban shongthaid shipor ha kane ka jylla shuwa ban leit biang sha kiwei kiwei ki jaka.
Ka jingwan poi ki sim Amur Falcon ha katei ka thaiñ kala khring ruh ïaki paidbah sha katei ka jaka ban leit peitkai ïa kitei ki jaitsim kiba her da ki lakh tylli bad dem haki dieng bad ki siej ha katei ka thaiñ haka por janmiet.
Naka liang ka ophis treikam ka Tyrso Valley Wildlife Protection Society lyngba u Chairman jong ka u Bah Rojen Sten, uba long ruh u Sordar ka Shnat Raid Tyrso ha ka jingdon ryngkat lem u Secretary bad ki dkhot mynta ka sngi ki la pyntip ba ki sim Amur Falcon kiba ju wan poi shisien shisnem ha ka thaiñ Tyrso bad khamtam ha ka Shnong Umru, Ri Bhoi District kila wan poi da ki lakh tylli bad kin tang ha ki bnai Naiwieng kitei ki jait sim kila leit phai noh na katei ka shnong.
Haba kren sha ki lad pathai khubor, u Bah Rojen Sten kum u Chaiman ka Tyrso Valley Wildlife Protection Society, u la khot bad wer ïa ki paid nongshnong jong ka jylla Meghalaya bad wat ki nongjngohkai pyrthei ba nabar jylla ba kin wan ban sakhi da la ki jong ki khmat ïa kitei ki jait sim kiba wan ban buhai shnong shipor ha katei ka thaiñ.
U Bah Rojen Sten u la pyntip ruh ba ka por ban khmih ïa kitei ki sim ka long tang haka por janmiet bad dangstep phyrngap.
