Nongpoh, Nohprah 12: Kum ka jingput turoi ban pynkhlaiñ ïa ka party Trinamool Congress (TMC) hapoh ka jylla Meghalaya sa tang da ki bnai ban poi sha ka jingjied ban pynthymmai ïa ki nongmihkhmat sha ka ïing Dorbar Thaw Aiñ ka jylla, ka khliehduh jong ka party TMC bad kaba dei ruh ka Myntri Rangbah jong ka West Bangal mynta ka sngi ka la wan poi ha ka jylla Meghalaya ha kaba ki nongïalam ka TMC bad ki nongkyrshan na ka jylla Meghalaya ki la pdiang burom ïa mynta ka sngi hadien ba ka la wan poi ha Umroi Airport.
Ïa kane ka khliehduh jong ka party TMC, ka Mamata Banerjee kaba la wan ban iuh kjat sha ka jylla Meghalaya ha ka sien kaba nyngkong la synran lang ruh da u National General Secretary ka TMC, u Abhishek Banerjee bad la pdiang burom ïa ka hadien ba ka la wan poi ha Umroi Airport da u State President ka TMC, u Bah Charles Pyngrope ha ka jingdon lang u myntri barim ka jylla, Dr. Mukul Sangma, u State Vice president bad MLA ka Umroi, u Bah George B. Lyngdoh ryngkat kiwei kiwei ki nongïalam ka party TMC na Ri Bhoi District bad na ka jylla.
Kane ka khliehduh ka party TMC ïa mynta ka sngi kan nym don kano kano ka prokram kiba ïa dei bad ka party ne ban kynduh ïa ki paidbah bad kan bteng ïa ki prokram bapher bapher naduh ka sngi Baar jong ka taiew bad khamtam ban ïa kren bad ban ïaphylliew jingmut halor ki kam election bad ruh ban pynkhlaiñ ïa ka party da ki prorkram bapher bapher ba kan sa leit ban shim bynta ha kane ka jingwan iuhkjat ha ka sien kaba nyngkong eh sha Meghalaya shuwa ka election 2023 hapoh ka jylla.
Kumba la ïathuh da ka party TMC, ha ka sngi baar, kan sa don ka jingïalang ha U Soso Tham bad ha Windermere resort, ba kane ka khliehduh ka party TMC, ka Mamata Banejee kan ïa kynduh ïa ki nongïalam ka party bad ban ïa kren halor ki kam ka party shuwa ka election 2023 bad kane ka khliehduh ka party TMC kan shim bynta ruh ban rakhe lypa ïa ka Chirstmas ryngkat ki khynnah khunswet na ki jaka ri khunswet bapher bapher, kan ïa kynduh ruh ïa ki khlieh nongsynshar, ki nongïalam jong ka imlang ka sahlang ban pynpaw halor ka nongrim jong ka TMC.
Haba kren sha ki nongthoh Khubor hadien ka jingwan poi katei ka khliehduh ka party TMC ha Umroi Airport, u Myntri Rangbah barim ka jylla, u Dr. Mukul Sangma bad u State Vice president bad MLA ka Umroi, u Bah George B. Lyngdoh ki la ong ba kum ki nongïalam bad ki nongkyrshan ka party ki da sngewkmen haduh katta katta ba kane ka khlieh duh ka party ka la wan poi ha ka jylla ha ka sien kaba nyngkong eh bad baroh ki nongïalam bad ki paidbah ki la ioh lad ruh ban ïa kynduh ïa kane ka nongïalam ba hakhliehduh ka party kaba wan sha ka jylla Meghalaya na ka bynta ban ioh ban ïa phylliew jingmjut bad ki paidbah shuwa ban kynjoh sha ka jingpynkhreh ban ïa khun ïa ka election 2023 hapoh ka jylla Meghalaya.
Ki la ong ruh ba kane ka jingwan iuhkjat katei ka khliehduh ka party ha ka jylla ka la ai mynsiem shibun ïa ki nongïalam ka party bad kumjuh ruh ïa ki paidbah nongkyrshan bad na ka liang kane ka khliehduh kan ïoh lad rurh ban ïa kynduh ïa ki paidbah na ka bynta ban pynshai halor ki nongrim ka party bad ruh ka thong kaba ka party ka don ban pyntreikam ha ka jylla Meghalaya.
Shuh shuh, la ong ruh ba ka sa don ruh ka jingïalang kyrpang ban ailad ïa ki paidbah ban pynsngew ïa kiei ki jingsngew jongki hakhmat kane ka khliehduh ka party bad kum ka khliehduh ka party kan sa kren ruh halor shibun ki nongim ka party khamtam ban pynkhlain ïa kane ka party shuwa kane ka election 2023 ha kaba lada wan ha ka bor shibun ki jingkylla kin sa wan hapoh ka jylal Meghalaya.
