Wan poi 100 tylli ki dukan ha ka ‘District Buyer-Seller Meet cum SHG Mela-2025 ha Jowai

Jowai, Nohprah 07 : Ka ophis jong u Deputy Commissioner, ka West Jaiñtia Hills District ha ryngkat ka jingïatreilang bad ki tnad sorkar bapher bapher kiba pynlong ïaka ïew pyninam ïa ki mar rep kiba pynmih napoh ka District ka ban neh ar sngi lynter ïa kaba la sdang mynta ka sngi 5 tarik bad pynkut lahshai 6 tarik u Nohprah ha madan Jrisaleiñ, Jowai kaba la tip kum ka ‘District Buyer-Seller Meet cum SHG Mela 2025’.
Ïa kane ka District Buyer-Seller Meet cum SHG Mela la pynlong haka sien kaba lai ha kaba ki tnad sorkar, ki kynhun treimon sngewbha, ki nongrep bad kiwei de kila wanrah ïa ki mar rep jong ki sha kane ka ïew kaba la don haduh 100 tylli ki stalls baroh.
Ha kane ka sngi sdang na ka liang u MLA ka Jowai u ma Wailadmiki Shylla uba dei u Myntri ka koit ka khiah bad ka kam ïalehkai Sports ula long u kongsan, ha ryngkat ka jingïadonlang u Deputy Commissioner ka WJHD u Abhinav Kumar Singh, IAS, ka kong B. Blah Project Director DRDA & Nodal Officer DMMU, u bah Shanlang Lyngdoh, COO-LP, MSRLS-SMMU kiwei de ki ophisar sorkar nalor ki nongrep jong ka District.
Ha kane ka ïew pyniñam ïa ki mar rep kiba kynthup naduh ki jhur, jait syntiew, ki symbai jhur, ki soh ki pai, ki tiar ba shna kti, ki jaiñ ki nep, ki jingbam tynrai ba bun jait nalor kiwei kiwei la wan rah da ki nongrep jong ki shnong bapher bapher.
U kongsan u ma Wailad haba kren kum u kongsan ula kyntu ïa ki nongrep ban long kiba ïaishah bad kiba trei shitom ïa ka kam rep namar ha kawei ka sngi ka District West Jaiñtia kan long kaba paw eh ban pynmih ïa ki marrep hapoh ka jylla bad ha ka Ri hi baroh kawei.
Ula pynsngew ha ki snem bala dep kiba bun na ki tnad sorkar kila pynlong la ka jong ka jong ki ïew pyninam ïa ki mar rep hynrei naduh u snem 2023, kum u MLA ula ai jingmut ban pynlong noh shi jaka ïa kum kane ka ïew kaba heh ïa kaba la tip kum ka ‘District Buyer-Seller Meet cum SHG’.
Kum u MLA u kyrmen skhem hadien san snem kane ka District Buyer-Seller Meet cum SHG Mela kan long kaba ïaid ïew, ha kaba yn hap ban shim noh da ka dor na ka bynta ban thied ïa ki Stall namar ka jingdawa bad ka dor kan kiew kumba long ka Tamasa Cherry Blossom.
Shuh shuh ula kyntu ïa ki bor District ba kin pynlong ïa ki prokram ai jinghikai ïa ki nongrep ka District ba kin tip kumno ban pynïaid ïew ïa ki mar ki mata, da kaba pyndonkam ïa ka juk Social Media. Ula pyntip ruh ha une u snem ban wan kum u MLA ka thaiñ un kyrpad ïa u Myntri Rangbah ka jylla ba un wan khnang sha kane ka ïew pyninam.
Ha kane ka ïew la wanrah ruh ïaki lad pynïoh kam ïa ki khun samla lyngba ki (Job Fair) jong ki Company bapher bapher ki ban ai jingtip khambniah, katba ha ka por janmiat kala don ka jingpynbyrnia da ki nongrwai bad ki nongput nongtem kiba napoh ka District kiba la ïoh jingïarap na ka sorkar lyngba ka Meghalaya Grassroots Music Artist.