Wan phai sa 13 ngut ki samla pule Meghalaya lyngba ka ICP Dawki bad Kolkata

Shillong, Naitung, 21: Ki bor sorkar ha ka sngi u Blei ki la pyntip ba ki don sa 27 ngut ki samla pule na ka ri India ba kynthup ïa ki 6 ngut ki samla pule na ka Jylla Meghalaya kiba la wan phai na ka ri Bangladesh lyngba ka Integreted Check Point (ICP) Dawki.
Ryngkat lang bad kane ka kynhun, ki don ruh sa 11 ngut ki samla pule jong ka ri Nepal kiba wan phai na ka ri Bangladesh lyngba ka ICP Dawki.
Shuh shuh, sa 7 ngut ki samla pule ka jylla Meghalaya ki la poi ha Kolkata Air Port ha ka por 8:00 baje mynstep lyngba ka liengsuiñ Biman Bangladesh.
Ka khubor Sorkar ka ïathuh ba kine ki samla pule ki la wan poi ha Guwahai Airport ha ka por 5:30 baje janmiet da ka liengsuiñ IndiGo.
Haduh mynta ki samla pule kiba la wanphai na ka ri Bangladesh sha Meghalaya lyngba ka ICP Dawki ka la kot sha ka 744 ngut ha kine ki saw sngi lynter.
Ka ri Bangladesh ka la pluh hadien ba la mih ka jingpyrshah na ki samla pule ïa ka jingmang bhah kam kyrpang kaba 30% ïa ki khun ki kti jong ki shipai kiba la don bynta ha ka jingïaleh laitluid ha u snem 1971.
Katba ki saw phew ngut ki samla pule ka jylla Meghalaya kiba la mih na ka ri Bangladesh bad wan poi ha khappud jong ka Sonamura, Tripura ha ka sngi Saitjaiñ, ki la poi mynta sha la ka jong ka jylla ha ka sngi u Blei.
Shwa ban leit phai sha la ki jong ki iing ki sem ha ki district bapher bapher ka jylla kine ki samla pule ki la shong jahthait shipor ha Circuit House, Deiñchynrum tang shu poi ha East Jaiñtia Hills ha ka por 6:30 baje janmiet.
La pdiang sngewbha ïa kine ki samla pule da ki heh Sorkar na East Jaiñtia Hills District bad la pynshongthait ïa ki shipor bad ai bam ïa ka jamiet shwa ba kin bteng biang ïa ka lynti ïaid haduh ba kin da poi sha la ki bahaing hasem.
U Deputy Commissioner jong ka East Jaiñtia Hills District u Shivansh Awasthi, u la ïathuh ba napdeng kine ki saw phew ngut, san ngut ki dei na East Jaiñtia Hills District.
Ïa kine ki san ngut la leit shaw da ki kmie ki kpa na Circuit House bad hadien ba ki ladep bam, ki laiphew san ngut pat kiba na kiwei kiwei ki district ki la bteng biang ïa ka jingïaid lynti da ka Bos kaba ki la wan na ka Jylla Tripura.
Ha ka jingïaid lynti na Tripura sha Meghalaya, ka Sorkar ka la pynbiang ruh ar tylli ki Bos Super Deluxe Sleeper Coach ba la synran lang da ki Pulit khnang ban pynthikna ïa ka jingsuk ha ka leit ka wan bad ka jingshngaiñ jong ki samla pule.
Kine ki saw phew ngut ki la mih noh na ka ri Bangladesh namar ka jingïakynad kaba jur kaba la khie ha kane ka ri, kumta ban pynkhreh ïa ka jingwan poi jong kine ki samla pule, ki ophisar jong ka Sorkar Meghalaya ka la ïatreilang bad ki ophisar jong ka Sorkar Tripura ki la shim khia ha kaba pynpoi suk ïa kine ki samla pule.
Ka Sorkar Jylla ka la ïakren ruh bad ki bor pynïaid jong ka Indian Embassy ha ka ri Bangladesh ban pynthikna ïa ka jingshngaiñ ha ka jingpynkynriah ïa ki samla pule na ki jaka ba ki sah.