Shillong, Nailur 28 : U Symbud Myntri Rangbah ka jylla u bah Prestone Tynsong u la wan phai noh sha la ïing hangne ha nongbah Shillong naduh ka Sngi Palei (26.9.2024) hadien ba ki doktor ki la dep eksamin bha bad lap ba u la ïoh ïa ka jingkoit jingkhiah kaba pura.
Ia kane ka jingeksamin bniah bad test biang ïa u Symbud Myntri Rangbah la leh da ki doktor ka Apollo Hospital New Delhi ha ka Sngi Balang bad hadien ba ki la lap ba ym don jingwit ei ei shuh bad baroh ki test ki biang lut nadong shadong la shah ba in leit phai noh sha Meghalaya.
Kum ban pynkynmaw ba hadien ba ka jingsumar ka long kaba jop na ka liang ka Apollo Hospital ka la pyllait ba in leit sah noh sha Meghalaya House New Delhi naduh ka 16.9.2024 bad baroh kine ki sngi i sah beit ha katei ka jaka tad haduh ban da pyndep biang ia ki jingeksamin bad test shwa ban wan phai ïing.
Lah ban pynkynmaw ba u Symbud Myntri Rangbah u la ud ktha klieh shwa nyngkong bad u shu sumar hi ha la ïing hynrei ha ka 9 tarik namar ka jingktha khlieh ka ïai bteng u la phah khot doktor sha ïing bad hadien kane ki doktor ki la phah ba in leit leh ïa ka MRI ha Civil Hospital bad dei hadien ba ïoh ïa ka report la lap ba don ka jinglang snam ha jabieng ba sa ïalam ïa i sha Nazareth Hospital bad la pynthiah ïa i ha ICU.
Ha ka Sngi Balang kata ha ka 11 tarik i la leit shah sumar sha Apollo Hospital New Delhi. Ha ka Sngi Palei kata ha ka 12 tarik ki doktor ki la sumar bad puid ban sei ïa katei ka snam ba lang ha jabieng bad ka jingsumar ka long kaba jop. Hadien ba la dep sumar la pynthiah ïa i ha ICU kumba shisngi bad hadien kane la pynkynriah noh ïa i sha Ward nangta sa pyllait ba in leit sah sha Meghalaya. Mynta i la khlaiñ bha bad i la ïoh ban wan phai noh sha la ïing .
