Shillong, Nailur : Ka Sacred Heart Boys Higher Secondary School, Mawlai Phudmuri ka la wan nyngkong ha ka ïakob rwai kynhun (Singing Competition) Inter School ba la pynïaid da ka Christ Church Morning School, Mawlai Syllaikariah ba la pynlong kum shi bynta jong ka jingrakhe dap 25 snem jong kane ka skul step.
Ka Sacred Heart Girls HSS ka la wan ba Ar bad ka Chirst Church Morning School ka la wan balai.
Katba ha ka ïakob rwai (Singing Competition) para marwei ne Solo u Rozelbert Syiemlieh ka Sacred Heart Boys u la wan nyngkong, ka Jennifer Jone Sylliang jong ka Sacred Heart Girls kala wan baar bad u Hababiang Wahlang ka Nongkwar Secondary School u la wan balai.
ïa katei ka jingïakob rwai la wan ban sakhi da u bah Marbud Dkhar, u kyrtong ban ïakhun ha Mawlai konstitwensi na ka tiket Congress kum u kongsan ha ka jingdon ryngkat jong u bah Brightstar Marbaniang ba shah khot sngewbha, president ka Managing Committee u bah A. Syiem, principal ka Christ Church Morning bah B. Lyngdoh bad kiwei kiwei.
Haba ai jingkren u bah Marbud u la pynpaw ka jingsngewkmen ban ïa don bynta lang bad jingrakhe dap ar phew snem jong ka Chirst Church Morning School bad u la ai khublei ïa u principal, ki nonghikai bad ïa ki staff baroh.
Ha kane ka sngi u la pynpaw ruh ïa ka jingsngew bynñiaw ha kaba ïa dei bad ki nonghikai kiba la mad bad shem jingeh shibun ha kine ki snem, kaba la ktah wat ïa ka burom jong ki, khlem da klet ïa ki jingeh ha ki por khangdam (lockdown) kaba ki la shah ktah.
“Hynrei, haba ngi ïohi pat ba ki dang len ïalade kum ha kine ki por ba eh katno ka sngew myllung,” ong u bah Marbud.ïa kane ka Singing Competition ki la pynlong ha ka 10 tarik u Nailur, 2022 ha phyllaw jong ka skul.
