Jowai, Jymmang 04: Ka ophis jong ka District School Education Officer, Jowai ha ryngkat ka jingïatreilang bad ka ophis Planning officer, Jowai mynta ka sngi kila pynlong ïaka jingïakop kyntip na ka bynta ki khynnah skul ne ka ‘Inter School Quiz Competition’ kaba la long ha Ladthadlaboh Dorbar Shnong Indoor Hall, Jowai.
Ha kane ka jingïakop la wan ban ïashim bynta da ki Hynñiew (7) tylli ki skul kiba kynthup ïa ka North Liberty Higher Secondary School, Thomas Jones Higher Secondary School, Kiang Nangbah Higher Secondary School, Government Girls Higher Secondary School, Government Boys Higher Secondary School, KJP Synod Mihngi Higher Secondary School bad ka Q.C Springside Higher Secondary School
Ka jingpynlong ïa kane ka jingïakop kyntip shi bynta na ka ka ‘North East Festival, 2022 ban rakhe ïa ka jingdap 75 snem ka Ri ne ka Azadi Ka Amrit Mohotsav (AKAM)’ bad ïa kane ka jingïakop la pynïaid da u (Quiz Master) ma R. S Teron, Block Mission Coordinator (BMC).
Ïa ka kyrdan ba nyngkong la ïoh rah da ka Government Boys Higher Secondary School ba la mihkhmat da u Somanroy Myrchiang bad ka Graceful Mary Phawa, ba wan ba ar ka Government Girls Higher Secondary School Second ba mihkhmat da ka Safety Care Pohleng bad ka Peruse Ryngkhlem, katba ïa ka kyrdan ba lai la ïoh da ka North Liberty Higher Secondary School, Jowai ba la mihkhmat da u Ribait Phawa bad u Sneinbha Suchaing. Ïa ki nongjop la sam da ka khusnam ryngkat ki Trophy bad ki Certificates.
Hashwa kane la don ka jingïalang ba lyngkot bad la ïoh ka jingkren na ka kong A. P Syiem, District School Education Officer bad u AC Roy, Assistant District Adult Education Officer, Jowai kiba la batai shaphang ka jingmut jong ka jingrakhe ïa ka Azadi ka Amrit Mohotsav ka jingïoh laidluid ba 75 ka Ri India. Ïa ka prokram la pynïaid da ka kong C. Lyngdoh, Sub- Inspector of School Education Officer.
