Wan kynduh u MLC ka Bihar ïa u Bah Sanbor ban ïatai halor ka mangtyngka ka sorkar pdeng

Shillong, Rymphang 12 : U nongmihkhmat jong ka Bihar Legislative Council (MLC), u Devesh Kumar ha ka sngi Palei u la wan ban kynduh ïa u Myntri ka sorkar Jylla, Bah Sanbor Shullai ba dei ruh u MLA ka BJP na Shillong South ban ïa kren bad ïatai sani halor ki mat bapher bapher kiba ïadei bad ka Mangtyngka jong ka Sorkar Pdeng na ka bynta kane ka snem treikam.
Haba kren bad ki lad pathai khubor, une u nongmihkhmat bad nongïalam ka BJP u la ïathuh ba ka jingwan jong u sha Meghalaya ka long ruh ban pynsngewthuh ïa ki paidbah halor ka mangtyngka jong ka sorkar pdeng bad kumno kan pynmyntoi ïa ki nongshong shnong kynthup lang ïa ka Meghalaya bad kiwei ki jylla jong ka thain shatei lam-mihngi jong ka Ri.
“Ngi kwah ban pyntip ïa baroh ki nongshong shnong ka ri shaphang kane ka mangtyngka bad kumno kan kyntiew ïa ka ri ba kan poi sha ka kyrdan kum ka ri kaba kiew shakhmat,” u la ong.
Da kaba ïaroh ïa ka Mangtyngka jong ka sorkar pdeng, une u MLC u la ong ba kane ka don ruh ïa ka thong ban pynlong ïa ka India kum ka ri kaba la kiew ha ka ïoh ka kot ha shwa u 2047.
Nangta u ong ruh ba kane ka mangtyngka ka don lut ka thong ban kyntiew ha ki liang baroh ha ka imlang sahlang, la ka long naduh ki samla, ki longkmie, ki nongrep bad ki nongtreikam lajong.
Ha kane ka jingwan jong u MLC la donlang ruh ki nongïalam jong ka BJP na ka jylla bad kiwei kiwei.