Mawkyrwat, K’lyngkot 17: Ka kynhun jong ki hati khlaw kumba 9 tylli ei ei ha kine ki sngi ki la kiew sa ha u Lum Ïawpaw bad ki la sdang ruh wat ban pynjot ïa ki mar rep kum ki kwai, tympew, synsar, diengkait bad wat ïa ki ïing ki sem jong ki nongrep ha kaba kane ka long kaei kaei kaba pynduh mynsiem ïa ki nongrep kiba la trei shitom ha kaba thung ba tep.
Namarkata, katkum ka tyllong khubor ba la ïoh la ong, ba ki paidbah nongrep ryngkat ki nongsynshar shnong jong ka thaiñ Nongnah ki la ïa pyrkhat kyrkieh na bynta ban ïada ïa ki mar rep jong ki da kaba leit beh ïa kane ka kynhun ki hati bad ka lah shimpor haduh da ki phew sngi bad ha kane ka jingleit beh ruh ym lah satia ban pynkohnguh ïa ki ba kin leit phai noh sa la ka jaka. “Mynta lei lei kine ki hati ki la sdang ban beh kylla ruh ïa ki briew bad kane ka la pynsyier mynsiem ïa ki paidbah khamtam eh ïa ki nongrep namar kim nud shuh ban leit rep”, ong u Myntri shnong Domsohkhai, u bah Slanborlang Kharryja.
Kumta, u Myntri jong ka shnong Domsohkhai u la ong ba na ka liang ki nongsynshar shnong ruh ki la dep pyntip la bunsien ha ka tnad wild life hynrei kane ruh kam urlong namar kim don wat uwei u ophisar ban wan jurip bad ki ong pynban ban shondur ki jaka ki ïing ki sem ba lah shah pynjot khnang ban ai jingïarap, hynrei ki paidbah nongrep kim kwah ïa ka song pisa namar ki tip shai ba ka sorkar kam lah ban ai katkum ka jingjot ki mar rep bad ki ïing ki sem.
Kawei ruh, lada ki ai jingïarap ruh kan long tang shisien hynrei ka jingduhnong jong ki nongrep kan long shi jingim lada kine ki hati kin dang ïaisah ha kine ki jaka, u la ong. Namarkata, ki nongrep ki kwah tang ban beh ne pynkynriah noh ïa kine ki hati na kine ki jaka khnang ba ka ïaid ka ïeng ha ki jaka rep kan long kaba shngaiñ.
Katba na ka liang jong u bah Micheal Lyngdoh ha ka jingkren jong u u la ong ba ha ka 16-01-2023 hadien ka jingpyntip ha ki briew jong ka wild life, ki ong ba kin wan bad ki la phah ap ïa ki ‘riew rangbah jong ka dong ka thaiñ hynrei ki khlem wan. “Haba phun shisien ki ong ba ki lah poi shaneng Mawkyrwat, ynda phun biang ki ong lah poi Mawkyrwat hynrei ka long kaba sngewsih ba ynda phun biang kim shim shuh wat ïa ka mobile ruh”, u la ong.
