Wan jurip ki nong Japan ïa ka West Khasi Hills ban hikai thung Tit Tung

Nongstoiñ, Lber 25: Ki katto katne ngut ki nong Japan kiba kynthup ïa u MAJ Gen. Takayuki Hirano u ba dei ruh u President ka BJBSI bad u Yasuhide Ito Chairman & MD Yats Corporation, ha ka sngi thohdieng jong ka taiew ki la wan ban jngoh kyrpang ïa ka West Khasi Hills District.
Kitei ki heh company na ka Yats Corporation kawei na ki Company kaba heh bha na ka Ri Japan, ki la leit ban jngoh kyrpang ïa ki khlaw ki btap bad ïa ki dieng ki seij jong ka shnong Seiñduli. La ong ba ha ka jingjurip jong ki, la lap ba katei ka jaka ka long kaba biang pura na ka bynta ban thung tit.
Ïa kitei ki ar ngut la synranlang da u Col Ranjeet Singh Managing Partner Stratrislconsult, u bah Zacheus Tympuiñ, President ka Hill Farmer’s Union, West Khasi Hills District, bah Pascal Dkhar Shongknor ka Hill Farmer’s Union jong ka thaiñ Mawshynrut Block Unit bad kiwei kiwei ki riew rangbah jong ka thaiñ kiba la pdiang sngewbha ruh ïa kitei ki khar Japan ha khlaw.
La ong ba kawei ka Karkhana ka ban long kum ka jaka tylliat ïa u dieng, yn buh ha West Khasi Hills bad ka thong ka long ban pynurlong hapoh u snem 2023. La ong ruh ba na ki dieng baroh dei u Diengstap u ba bha palat ban pynroi ne ban pynsted haba thung ïa u tit tung u ba ki ong Shitake mushrooms ha ka ktien Japan.
Halor kane ka bynta, na ka liang ki nongialam ka Hill Farmer’s Union West Khasi Hills, kim lah ban khlem da pynpaw ka jingkmen bad ka jingkyrmen skhem ruh, ba lyngba kane ka jingwan kine ki ar ngut ki riew stad na Japan, kan ïarap ban kyntiew lem na ka bynta ki nongrep ha kane ka District bad ha ka Jylla hi baroh kawei.