Wan jurip ka NLM Delhi ïa rukom pyntreikam ka Veterinary Deptt ïa ki skhim ha Meghalaya

Shillong, Rymphang 12 : Ka tnad Animal Husbandary & Veterinary jong ka sorkar jylla ha ka sngi Palei ka la shong ïa ka jingïalang bad ka kynhun na ka National Level Monitoring (NLM) jong ka sorkar pdeng ba wan na New Delhi ha ophis Director Animal Husbandary & Veterinary Department, Shillong.
Ïa kane ka jingïalang la pynïaid da ka Dr. (Ms.) A. Chyne, Director, Animal Husbandry & Veterinary Department, ryngkat ka jingdonlang ka Dr. MD. Sharma, (ISS) Deputy Director & Nodal Officer Central Sector Schemes ryngkat lang ki heh sorkar na ka tnad bad ki nongmihkhmat na ki tnad treikam.
Katba na ka liang ka National Level Monitoring Team, ka kynhun ïa Dr. Mihir Mondal (NLM, DAHD) bad Dr. Mahesh Katara National Level Monitoring, kiba la wan khnang sha ka jylla na ka bynta ban peit bad jurip ïa ka rukom pyntreikam ïa ki skim jong ka sorkar pdeng kiba la pyntreikam da ka tnad.
Kine ki skim jong ka sorkar pdeng kiba hap ban buddien ki kynthup ïa ka Rashtriya Gokul Mission (RGM), National Livestock Mission (NLM), Livestock Health & Disease Control Programme (LHDCP), National Programme for Dairy Development (NPDD), nalor kiwei kiwei ki skim kiba ïadei bad katei ka tnad ha kane ka jingwan kaba sdang naduh ka 12-16 tarik mynta u bnai.
Kane ka kynhun na ka sorkar pdeng kin leit ruh ban jurip ïa ki jaka ha East Khasi Hills, West Khasi Hills, bad West Garo Hills distrik bad pynlut por ruh bad ki nongïoh jingmyntoi nalor ban ïohi ruh markhmat ïa ka jingpyntreikam ïa ki skim.
Katkum ka kyrwoh ba la phah da ka Director la ong ruh ba kane ka jingwan jurip jong ka kynhun na sorkar pdeng kan pynkhlain shuh shuh ïa ka rukom treikam nalor ba kan ai ruh ka jingai jingmut kaba bha na ka bynta ban pynbha bad kyntiew shuh shuh ïa ka kam ri jingri ha ka jylla.